पिंपरी, ता. २१ : पथारी, हातगाडी, स्टॉलधारक, फेरीवाला यांच्यासाठी पुण्यातील पंचशील फाउंडेशनने ‘हॉकर्स पार्क’चे नियोजन केले आहे. या प्रकल्पाची महाराष्ट्र फेरीवाला क्रांती महासंघाचे शिष्टमंडळ व पथ विक्रेता समिती सदस्यांनी नुकतीच पाहणी केली.
यावेळी महासंघाचे अध्यक्ष काशिनाथ नखाते, प्रदेश संघटक अनिल बारवकर, पथ विक्रेता समिती सदस्य राजू बिराजदार, किरण साडेकर, किसन भोसले, लाला राठोड, राजेश माने, सलीम शेख, ओमप्रकाश मोरया आदी उपस्थित होते.
पुण्यातील खराडी येथे पथ विक्रेत्यांसाठीच्या या पार्कमध्ये १२० फेरीवाल्यांना सामावून घेण्यात येणार आहे. भाजीपाला, फळे विक्रीसह खाद्यपदार्थ विक्री व इतर सेवा सुविधा देण्याची व्यवस्था करण्यात येणार आहे. याठिकाणी ५० मोटारी व १५० दुचाकी वाहनांसाठी वाहनतळ सुविधा आहे. पिंपरी चिंचवड शहरात ६४ ठिकाणी हॉकर्स झोन निर्माण करण्यात येणार आहेत. त्या दृष्टीने प्रयत्न करण्यात महापालिका आयुक्त शेखर सिंह तसेच सर्व क्षेत्रीय अधिकारी यांच्याशी चर्चा सुरू आहे, असे नखाते यांनी सांगितले.