पिंपरी, ता. २२ ः शारदीय नवरात्राला पिंपरी चिंचवड शहरात मोठ्या उत्साहात सुरवात झाली. नवरात्रोत्सवानिमित्त शहरात चैतन्य निर्माण झाले आहे. सोमवारी पहाटेपासूनच देवीच्या मंदिरांमध्ये धार्मिक कार्यक्रम सुरू झाले. घरोघरी महिलांनी घटस्थापना केली.
भाविकांनी दर्शनासाठी रीघ लावल्यामुळे मंदिरे गजबजून गेली होती. घरोघरी घटस्थापना केल्यानंतर मंदिरात जाण्यासाठी महिलांची लगबग सुरू होती. सायंकाळी सार्वजनिक मंडळांनी वाजतगाजत मिरवणूक काढून देवीची स्थापना केली.

घरोघरी घटस्थापना

नऊ दिवस चालणाऱ्या आदिशक्तीच्या उत्सवासाठी गेल्या अनेक दिवसांपासून महिलांची जय्यत तयारी सुरू होती. सोमवारीही पहाटेपासूनच घटस्थापनेची तयारी सुरू करण्यात आली. सकाळी पूजासाहित्यासाठी बाजारपेठेत, तर फुले, हार, पाने घेण्यासाठी फूलबाजारात गर्दी झाली होती. घरोघरी नागरिकांनी घटस्थापना करून नंदादीप लावले आणि देवीची मनोभावे पूजा केली.

मंदिरांमध्ये नवरात्रोत्सव

शहरातील मंदिरांमध्ये पहाटेपासूनच अभिषेक पूजा सुरू झाली. बहुतांश मंदिरांमध्ये नऊ दिवस देवीची विविध रुपांमध्ये पूजा बांधली जाते. सोमवारीही पांढऱ्या रंगाची वस्त्रे देवीला परिधान करण्यात आली. पहाटेपासूनच शहरातील विविध मंदिरांमध्ये भाविकांनी दर्शनासाठी गर्दी केली होती. आई राजा उदे उदे... अंबाबाईचा उदे उदे... अशा जयघोषात भक्तांनी देवीचे दर्शन घेतले. आकुर्डीतील तुळजाभवानी, निगडीतील दुर्गादेवी, पिंपरीतील वैष्णोदेवी, चिंचवडमधील कालिकामाता, दापोडीतील फिरंगाई, वडमुखवाडी व आळंदीतील पद्मावती, डुडुळगावातील येळाईमाता, पिंपळे गुरव येथील तुळजाभवानी या मंदिरांमध्ये भाविकांच्या दर्शनासाठी रांगा लागल्या होत्या. नवरात्रोत्सवामुळे मंदिर परिसरात यात्रेसारखे वातावरण निर्माण झाले आहे.
-----