सोमाटणे, ता. २४ : सततच्या पावसाने पवनमावळात मोठ्या नुकसानीला सामोरे जावे लागत आहे. यात प्रामुख्याने सोयाबीन, कडधान्यांसह अन्य पिकांचे मोठे नुकसान होण्याची चिंता शेतकऱ्यांना सतावत आहे.

या वर्षी मे पासून पावसाला सुरुवात झाली. तेव्हापासून अजूनही सातत्याने पाऊस सुरूच आहे. यामुळे भुईमूग, वाल, मटकी, तुरीसह कडधान्य पिकांचे मोठे नुकसान झाले आहे. कमी काळात हमखास चांगले पैसे मिळवून देणारे नगदी पीक म्हणून काही शेतकरी सोयाबीनला प्राधान्य देतात. सध्या हे पीक काढणीला आले आहे. पण, पाऊस उघडत नसल्याने हाती आलेले पीक वाया गेले आहे. काही ठिकाणी शेंगांना मोड फुटले आहेत. सोबतच भाजीपाला आणि फुलशेतीचेही मोठे नुकसान झाले आहे. सध्या हातातोंडाशी आलेले पीक वाया जाण्याच्या स्थितीत असल्याने शेतकऱ्यांच्या चिंता वाढल्या आहेत. त्यामुळे शासकीय पातळीवरून मदत मिळण्याची शेतकऱ्यांना प्रतीक्षा आहे.