पिंपरी, ता. २५ ः ‘‘सध्या सणासुदीचे दिवस असून या उत्सव काळात महावितरण कंपनीने वीजपुरवठा सुरळीत ठेवावा तसेच ग्राहकांच्या तक्रारी तातडीने सोडवाव्यात,’’ असे निर्देश मावळचे खासदार तथा केंद्रीय स्थायी ऊर्जा समितीचे सभापती श्रीरंग बारणे यांनी बुधवारी (ता. २४) महावितरण अधिकाऱ्यांना दिले.
महावितरणच्या पिंपरी कार्यालयात खासदार बारणे यांनी पिंपरी व भोसरी विभागाची आढावा बैठक घेतली. त्याप्रसंगी ते बोलत होते. बैठकीला महावितरणचे मुख्य अभियंता सुनील काकडे, अधीक्षक अभियंता सिंहाजीराव गायकवाड, कार्यकारी अभियंता सोमनाथ मुंडे व अतुल देवकर यांच्यासह पिंपरी व भोसरी परिसरातील अभियंते उपस्थित होते.
बारणे म्हणाले, ‘‘महावितरणने केंद्र सरकारची प्रधानमंत्री सूर्यघर योजनेची जनजागृती वाढवावी. जास्तीत जास्त नागरिकांना या योजनेचा लाभ द्यावा. जेणेकरुन महाराष्ट्राचा क्रमांक देशात प्रथम येईल.’’
मोहननगर, आकुर्डी, विवेकनगर, पिंपरी व भोसरीसह अन्य भागांतील नागरिकांनी विविध समस्या मांडल्यास त्यांच्या तक्रारींची सोडवणूक वेळेत करावी. त्यासाठी नवनवीन तंत्रज्ञानाचा वापर करावा, अशा सूचना त्यांनी अधिकाऱ्यांना बैठकीत केल्या. काकडे, गायकवाड यांनी वीज ग्राहकांच्या तक्रारींचा वेळेत निपटारा करण्याचे व वीजपुरवठा सुरळीत ठेवण्यासाठी योग्य त्या उपाययोजना करण्याचे आश्वासन दिले. यावेळी बारणे यांच्या हस्ते सूर्यघर योजनेतील ग्राहकांना प्रातिनिधीक स्वरुपात वीजमीटरचे वाटप करण्यात आले.