पिंपरी, ता. २६ ः दिघीतील महिलांसाठी आयोजित करण्यात आलेल्या ‘ऍग्रो मिलेट्स अँड फूड प्रोसेसिंग प्रॉडक्ट्स- मसाला प्रोसेसिंग’ या विषयावरील २६ दिवसीय सूक्ष्म कौशल्य उद्यमिता विकास कार्यक्रमाचे नुकतेच उद्‍घाटन झाले. भारतीय उद्यमिता विकास संस्थान आणि अ‍ॅक्सेंचर यांच्या संयुक्त विद्यमाने तसेच महिला आर्थिक विकास महामंडळ यांच्या सहकार्याने हा प्रशिक्षण कार्यक्रम घेण्यात येत आहे. महिलांना उद्योग कौशल्ये, साधने आणि आत्मविश्वास देऊन त्यांना स्वावलंबी बनवण्याचा उद्देशाने हा उपक्रम घेतला जात आहे. उद्‍घाटन समारंभात महिला आर्थिक विकास महामंडळाच्या पल्लवी गुळवे, आरती घुले, स्नेहल ठुबळ, प्रशिक्षक रोशनी बेहरानी आणि ईडीआय प्रकल्प अधिकारी सचिन मोरे उपस्थित होते. भारतीय उद्यमिता विकास संस्थान आणि अ‍ॅक्सेंचर यांनी पुणे जिल्ह्यातील महिला उद्योजिकांना सक्षम करण्यासाठी संपूर्ण पाठबळ, नावीन्यपूर्ण संधी आणि शाश्वत उद्यमशीलतेची परिसंस्था निर्माण करण्याची बांधिलकी व्यक्त केली आहे.