पिंपरी, ता.२६ : शहर पोलिस आयुक्तालयाच्या वतीने ज्येष्ठ नागरिकांसाठी आयोजित करण्यात आलेला ‘ज्येष्ठ नागरिक सुसंवाद मेळावा’ उत्साहात पार पडला. चिंचवडमधील प्रा. रामकृष्ण मोरे सभागृहात आयोजित या मेळाव्यात ज्येष्ठ नागरिक, ज्येष्ठ नागरिक महासंघाचे पदाधिकारी तसेच पोलिस अधिकारी सहभागी झाले होते.

ज्येष्ठ नागरिकांच्या सत्काराने कार्यक्रमाची सुरवात झाली. त्यानंतर ऑर्केस्ट्रा कार्यक्रमाचे आयोजन करण्यात आले. सायबर फसवणूक याबाबत पोलिस आयुक्त विनयकुमार चौबे यांनी माहिती दिली. इंटरनेट वापरातील सुरक्षितता, अनोळखी फोन कॉल्स, बँक व्यवहार व डिजिटल व्यवहार करताना घ्यावयाची खबरदारी मार्गदर्शन केले. कार्यक्रमात विविध प्रेझेंटेशन व व्हिडिओद्वारे सुद्धा मार्गदर्शन करण्यात आले.
अशा प्रकारचे उपक्रम नियमितपणे व्हावेत, जेणेकरून नागरिकांमध्ये विश्वास व सुरक्षिततेची भावना वृद्धिंगत होईल. असे मत अनेक ज्येष्ठ नागरिकांनी व्यक्त केले.
दरम्यान, ज्येष्ठांच्या सुरक्षा आणि सेवेसाठी पिंपरी-चिंचवड पोलिस कटिबद्ध आहेत, असे आश्वासन पोलिस आयुक्त विनयकुमार चौबे यांनी दिले.
-----------