पिंपरी, ता. ३० : दुचाकीवरून प्रवास करताना चालकांनी हेल्मेटसारख्या सुरक्षा साधनांचा वापर करावा, तसेच वेगमर्यादेचे पालन करावे, असे आवाहन डॉ. मंदार ताम्हणकर यांनी केले.
‘झिरो अपघात-माझी जबाबदारी’ हा संदेश देण्यासाठी डॉ. ताम्हणकर यांनी ऑस्ट्रेलिया खंडाला दुचाकीवरून प्रदक्षिणा घातली. त्यांच्या या मोहिमेची नोंद ‘इंडिया बुक ऑफ रेकॉर्ड’ तसेच ‘एशिया बुक ऑफ रेकॉर्ड’ मध्ये झाली आहे. यानिमित्त कासारवाडी येथील वाहनचालक आणि प्रशिक्षण संस्था व महाराष्ट्र मोटारचालक संघटना यांच्या संयुक्त विद्यमाने आयोजित कार्यक्रमात ते बोलत होते.
रस्ता सुरक्षा व महामार्ग अभियांत्रिकीतील नवकल्पना आंतरराष्ट्रीय ख्यातीचे रस्ते बांधणी तज्ज्ञ आणि ऑस्ट्रेलियन पदकाचे मानकरी डॉ. विजय जोशी यांनी प्रगत उपक्रमांची माहिती दिली. या वेळी भारतात सुरक्षिततेसाठी नवकल्पनांची अंमलबजावणी करण्याची गरज अधोरेखित झाली. खड्डे विरहित रस्ते निर्मितीबाबत तंत्रज्ञानाची माहितीही देण्यात आली.
‘आयटीडीआर’चे प्राचार्य संजय ससाणे, राज्य मोटर चालक संघटनेचे अध्यक्ष विजय दुग्गल, लेखक निखिल दाते यांनी मनोगत व्यक्त केले. मोनिका जोशी यांनी सूत्रसंचालन केले.
...