सोमाटणे, ता. २९ : नवरात्र उत्सवानिमित्त मावळातील प्रमुख देवस्थानांवर भाविकांनी मोठी गर्दी केली होती. पावसातही भाविकांनी दर्शनासाठी उत्साह दाखवत अमरजाईदेवी, वाघजाईदेवी व चौराईदेवी मंदिरात रांगा लावल्या होत्या. दरवर्षी नवरात्रात आठव्या माळेपासून दर्शनासाठी मोठी गर्दी होत असते. आज आठवी माळ असल्याने शेलारवाडी येथील स्वयंभू अमरजाईदेवी, सोमाटणे गावचे ग्रामदैवत चौराई डोंगरावरील चौराईदेवी, गहुंजे येथील वाघजाईदेवी (घोरावडेश्वर डोंगराच्या दक्षिणेला), दारुंब्रे येथील वाघजाई डोंगरावरील वाघजाईदेवी तसेच खंडाळा (बोरघाटमाथा) येथील वाघजाईदेवी मंदिरात भाविकांनी मोठ्या संख्येने हजेरी लावली. गेल्या आठ दिवसांपासून देवस्थानांतर्फे पहाटे महापूजा, आरती, महाप्रसाद, अभिषेक तसेच रात्री भजन-प्रवचन यांसह धार्मिक कार्यक्रम होत आहेत. याशिवाय महिला व शालेय विद्यार्थ्यांसाठी विविध स्पर्धांचे आयोजनही करण्यात आले आहे.
---