नात्यागोत्यांच्या कवितांची काव्यमय मैफल

कर्मयोगिनी महिला संस्थेच्या वतीने आयोजन

पिंपरी, ता. ३० ः कर्मयोगिनी महिला संस्थेच्या वतीने आयोजित करण्यात आलेली ‘कविता नात्यागोत्यांच्या’ ही काव्यमैफल नुकतीच चिंचवड येथे झाली. कवयित्री प्रा. संजीवनी बोकील यांच्या कवितांचे सुश्राव्य सादरीकरण करण्यात आले. आयुष्यातील मूर्त व अमूर्त नात्यांचा काव्यमय गोफ प्रा. बोकील यांनी सुरेल व प्रभावी कवितांद्वारे विणला. या वेळी प्रेक्षक मंत्रमुग्ध झाले. कार्यक्रमाचे निवेदन स्मिता लाटे यांनी केले. अभिनेत्री व गायिका सानिका जोशी यांनी सुमधुर गायन सादर करून सोहळ्याला अधिक रंगत आणली.
दुसऱ्या सत्रात बहारदार कविसंमेलनाचे आयोजन करण्यात आले. प्रा. सुरेखा कटारिया यांनी अध्यक्षस्थान भूषविले तर प्रमुख अतिथी म्हणून मीना पोखरणा उपस्थित होत्या. कवी मा. राजेंद्र घावटे, वंदना इन्नानी, माधुरी डिसोझा, बाबू डिसोजा, जस्मिन पोखरणा, तेजश्री देशपांडे, अनिल आठलेकर, प्रदीप तळेकर, निलेश शेंबेकर, प्रशांत पोरे व संजना मगर यांनी प्रभावी काव्यरचना सादर करून रसिकांना आनंदित केले.
सर्व मान्यवरांचा यथोचित सन्मान करण्यात आला. कार्यक्रमाचे सूत्रसंचालन हेमंत जोशी यांनी केले. सलोनी गांधी यांनी आभार मानले.