पिंपरी, ता. १ : विजयादशमी अर्थात दसऱ्याच्या मुहुर्तावर सरस्वतीपूजन, यंत्रपूजन, शस्त्रपूजनासाठी झेंडूच्या फुलांना मोठी मागणी असते. त्यामुळे शहरातील बाजारपेठा, मंडई तसेच चौकाचौकांत झेंडूची मोठ्या प्रमाणात आवक झाली.

गेल्या महिन्यात झालेल्या पावसाचा परिणाम यंदा झेंडू उत्पादनावर दिसून आला. त्यामुळे आवक वाढली असली, तरी भावही वाढले आहेत. किरकोळ बाजारात झेंडूसह ॲस्टर, शेवंती ही फुलेही महागल्याचे दिसून आले.
दसऱ्यानिमित्त सध्या शहरातील बाजारपेठांमध्ये उत्साहाचे वातावरण आहे. फुलांच्या खरेदीसाठी नागरिकांची रात्री उशिरापर्यंत गर्दी होती. मात्र, पावसामुळे ओल्या झेंडूंच्या फुलांचा तोडा करावा लागला आहे. ही ओली फुले विक्रीसाठी पाठवली जात आहेत. ओलसरपणामुळे बहुतांश फुले बाजारात येईपर्यंत खराब होत आहेत. त्यामुळे वाहतुकीचा खर्च वाया जात असल्याचे विक्रेत्यांनी सांगितले. पिंपरी चिंचवड शहरात विविध भागांमध्ये झेंडूचे व इतर फुलांचे भाव वेगवेगळे राहिले. पिंपरी, चिंचवड, भोसरी, आकुर्डी, मोशी या प्रमुख बाजारपेठा व मंडई येथे झेंडूचा किरकोळ भाव ८० ते १०० रुपये एवढा होता. मात्र, शहरातील पश्‍चिमेच्या भागात म्हणजेच वाकड , रावेत, पुनावळे, निगडी प्राधिकरण, पिंपळे सौदागर या भागात हीच फुले चढ्या दराने विकली जात होती. या भागात प्रतिकिलो दर १०० ते १५० रुपये एवढा होता.

फुलांचे भाव
झेंडू : ८० ते १५० रुपये किलो
ॲस्टर : ९० रुपये पावशेर
शेवंती : ८० रुपये पावशेर

‘आम्ही नाशिकहून फुलं विक्रीसाठी आणली आहेत. या वर्षी पाऊस जास्त झाल्याने शेतातून बाजारात आणेपर्यंत ती खराब होण्याचे प्रमाण वाढले आहे. त्यामुळे खरेदी आणि विक्रीतून फार काही नफा यावर्षी तरी होणार नाही. सर्व माल विकला कसा जाईल हेच आम्ही पाहत आहोत.
- अंकुश गुप्ता, फुल विक्रेता, आकुर्डी