पिंपरी, ता. ३ ः मोरवाडी ज्येष्ठ नागरिक संघातील सदस्यांची दोन दिवसीय मुक्कामी सहल सासवड, जेजुरी, गोंदवले, फलटण, औंध येथे झाली. त्यात ३२ सदस्य सहभागी झाले होते. अरविंद देशपांडे कोषाध्यक्ष यांनी सहलीचे संपूर्ण नियोजन, प्रेक्षणीय स्थळे व रोड मॅप याबाबत नियोजन केले. सासवड येथे सोपानदेव समाधी दर्शन, जेजुरी दर्शन, शिखर शिंगणापूर येथे शिवमंदिर, गोंदवले येथे ब्रम्हचैतन्य गोंदवले महाराज समाधी दर्शन, औंध येथे यमाई देवीचे दर्शन, नटराज मंदिर ठिकाणे बघणे झाले. सहल समन्वयक म्हणून हनुमंतराव गुभ्याड यांनी काम पाहिले. सहलीमध्ये पर्यवेक्षक म्हणून प्रज्ञा माडगूळकर व कविता भिडे यांनी काम पाहिले. ज्येष्ठ नागरिकांनी सहलीचा मनमुराद आनंद लुटला. अध्यक्ष बी. आर. माडगूळकर व सल्लागार माधवराव चौधरी यांचे मार्गदर्शन व सहकार्य लाभले.