पिंपरी, ता. ३ ः ज्येष्ठ साहित्यिक गिरीश प्रभुणे यांच्या हस्ते दिलासा साहित्य सेवा संघासाठी वार्षिक सदरलेखन करणाऱ्या सन्मानित करण्यात आले. याप्रसंगी कोल्हापूर येथील शिवाजी विद्यापीठाचे माजी कुलसचिव डॉ. राजेंद्र कांकरिया, महाराष्ट्र अंधश्रद्धा निर्मूलन समिती कार्यकारिणी सदस्य मिलिंद देशमुख, नितीन हिरवे, दिलासा साहित्य सेवा संघाचे सुरेश कंक व सुभाष चव्हाण यांची प्रमुख उपस्थिती होती.
एका वर्षाच्या कालावधीत यामध्ये सहभागी झालेल्या लेखकांची पुस्तके प्रकाशित झाली. त्यामुळे वेगवेगळे लेखक आणि वेगवेगळे विषय निवडून सलग पाच वर्षे हा सदरलेखनाचा उपक्रम यशस्वीपणे सुरू आहे. या उपक्रमांतर्गत अशोकमहाराज गोरे (वेदावतार तुकोबा), नारायण कुंभार (गण गणात बोते), राधाबाई वाघमारे (अंधारातून उजेडाकडे), श्यामला पंडित (बोधकथा), सीमा गांधी (साहित्यदीप), श्यामराव सरकाळे (साधी माणसं-प्रेरणादायी विचार) यांना सन्मानित करण्यात आले.
यावेळी सुरेश कंक म्हणाले, ‘‘सध्याच्या काळात संपर्क, संदेशवहन आणि अभिव्यक्तीसाठी व्हॉट्सॲप हे अत्यंत प्रभावी माध्यम आहे, ही बाब पाच वर्षांपूर्वी करोना काळात लक्षात आली. या माध्यमाचा सकारात्मक वापर करून दिलासा व्हॉट्सॲप समूहाने आठवड्यातील सात दिवस सात वेगवेगळ्या लेखकांना त्यांच्या आवडीच्या विषयावर सदरलेखन करण्याचे आवाहन केले. विजयादशमीपासून प्रारंभ करण्यात आलेल्या या उपक्रमाला उत्स्फूर्त प्रतिसाद लाभला असून आगामी वर्षभरात नवीन लेखक, नवीन विषय घेऊन सदरलेखनासाठी सिद्ध झाले आहेत.’’ प्रभुणे यांनी मनोगतातून साहित्यिकांना मार्गदर्शन केले. अंबादास रोडे, बाळकृष्ण अमृतकर, विलास कुंभार, मुरलीधर दळवी, फुलवती जगताप यांनी संयोजनात सहकार्य केले. प्रदीप गांधलीकर यांनी सूत्रसंचालन केले. तानाजी एकोंडे यांनी आभार मानले.