पिंपरी, ता. ३ ः नागरिकांशी सौजन्याने वागण्याबाबत वाहतूक पोलिसांना योग्य ते आदेश तसेच प्रशिक्षण द्यावे, असा सल्ला जागृत नागरिक महासंघाचे अध्यक्ष नितीन यादव यांनी निगडी वाहतूक विभागाचे वरिष्ठ पोलिस निरीक्षक सुदाम पाचोरकर यांना दिला.
निगडी वाहतूक विभागाने केलेल्या माहिती अधिकाराच्या अंमलबजावणीबाबत महासंघातर्फे पाहणी करण्यात आली. यात अभिलेख व्यवस्थापन आणि काही फलक लावणे या जमेच्या बाबी आहेत, मात्र कलम चारमधील १७ मुद्द्यांची समाधानकारक अंमलबजावणी झाली नसल्याचे आढळले.
यावर पाचोरकर यांनी त्रुटी लवकरात लवकर दूर करण्याचे आश्वासन दिले. खाकी पोशाख किंवा वाहतूक पोलिसाचा पोशाख घालून काम करणे ही शासकीय कर्तव्य व जबाबदारी आहे. पोलिसांच्या वेतनासाठी नागरिकांच्या करातून पैसा जातो, नागरिकांशी उद्धट आणि उर्मट वागण्याकरिता नाही, हा मुद्दा अधोरेखित करण्यात आला. त्यावर पाचोरकर यांनी पोलिस सौजन्याने वागले नाहीत, तर ताबडतोब कारवाई करण्याचे आश्वासन दिले.
-----