सोमाटणे, ता. ४ : ‘स्वास्थ नारी सशक्त परिवार’ या केंद्र व राज्य शासन पुरस्कृत उपक्रमांतर्गत प्राथमिक आरोग्य केंद्र आढले यांच्या वतीने आयोजित महिला आरोग्य तपासणी व उपचार शिबिरात ५०६ महिलांनी सहभाग नोंदविला. या शिबिराचे आयोजन पवनमावळ पूर्व भागातील सहा आरोग्य उपकेंद्रांच्या सहकार्याने करण्यात आले होते. मायमर मेडिकल कॉलेज हॉस्पिटल तळेगाव येथील स्त्रीरोगतज्ज्ञ व तज्ज्ञ डॉक्टरांच्या उपस्थितीत विविध तपासण्या घेण्यात आल्या. जिल्हा आरोग्य अधिकारी डॉ. रामचंद्र हुंकारे व तालुका आरोग्य अधिकारी डॉ. सॉरन सोनवणे यांच्या मार्गदर्शनाखाली शिबिर पार पडले. शिबिरात सर्वसाधारण आरोग्य तपासणी, नेत्र तपासणी, अस्थिरोग, त्वचारोग, नाक-कान-घसा, दंतरोग तसेच मनोविकास तपासणी अशा विविध तपासण्या करण्यात आल्या. ग्रामीण व दुर्गम भागातील वाड्या-वस्त्यांवरील महिलांनी उत्स्फूर्त सहभाग घेतला. या शिबिरात एकूण ५०६ महिलांची तपासणी करून आवश्यक ते उपचार देण्यात आले, अशी माहिती प्राथमिक आरोग्य केंद्र आढलेचे आरोग्य अधिकारी डॉ. दिलीप सूर्यवंशी यांनी दिली.
---