पिंपरी, ता. ६ ः निगडी प्राधिकरण येथील वीणा संगीत विद्यालयाच्या द्वितीय वर्धापन दिनानिमित्त पं. एम. वेंकटेश कुमार यांच्या गायनाचा कार्यक्रम पार पडला. या वेळी त्यांना ‘मायमाउली पुरस्कार’ व मानपत्र देऊन सन्मानित करण्यात आले. पंडितजींनी सुरुवातीस ‘मारवा’ या रागाने प्रारंभ केला. त्यानंतर, त्यांनी सरस्वती व दुर्गा हे राग सादर केले. त्यानंतर लोकाग्रहास्तव कन्नड वचने सादर केली. यानंतर पं. भीमसेनजींनी अजरामर केलेला ‘सौभाग्यदा लक्ष्मी बारम्मा’ हा अभंग गाऊन रसिकांची मने जिंकली. त्यांना तबल्याची साथ प्रशांत पांडव व संवादिनीवर साथ सुयोग कुंडलकर यांनी केली. पंडितजींना मानपत्र देऊन त्यांचा सत्कार पं. विनोद डिग्रजकर व राजेंद्र पोफळे यांच्या हस्ते करण्यात आला. तसेच, त्यांच्या साथीदारांचे सत्कार प्रथमेश पोफळे यांच्या हस्ते करण्यात आले. संस्थेच्या संचालिका डॉ. शर्वरी डिग्रजकर-पोफळे यांनी कलाकार व उपस्थित असलेल्या श्रोत्यांचे आभार मानले. अभय नलगे यांनी सूत्रसंचालन केले. या कार्यक्रमास श्रोत्यांनी भरभरून दाद दिली.
---