पिंपरी, ता. २८ ः सीमेवर देश रक्षणाचे कार्य करणारे सैनिक दिवाळीत सहभागी होऊ शकत नसल्याने त्यांच्या कुटुंबासोबत दिवाळी साजरी व्हावी या हेतूने गेली दहा वर्षापासून समस्त हिंदू आघाडीचे संस्थापक मिलिंद एकबोटे यांच्या वतीने सैनिकांच्या घरी जाऊन दिवाळी साजरी करण्यात येते. देशसेवेत सैनिक म्हणून कार्यरत असणाऱ्या खेड तसेच शिरूर तालुक्यातील केंदूर पाबळ, मांडवगण फराटा, शिक्रापूर, निमगाव म्हाळुंगे, कोरेगाव भीमा, धामारी, कान्हूर मेसाई, घोरपडी, खराडी अशा अनेक गावात जाऊन सैनिक सन्मान दिवाळी साजरी करण्यात आली. अनेक तरुणांनी सहभाग घेत सैनिकांच्या घरासमोर रांगोळी काढली. दारावर तोरण बांधले, दारात पणत्या लावून सैनिकांच्या परिवाराला मिठाई वाटप करून दिवाळीच्या शुभेच्छा दिल्या. भारत माता की जय, जय जवान जय किसान, वंदे मातरम् ,छत्रपती शिवाजी महाराज की जय, भारतीय सैनिकांचा विजय असो अशा घोषणांनी गावचा परिसर दुमदुमून गेला होता. शिवाजी अंबिके, हनुमंत तापकीर, शिवम सोनवणे, प्रतीक शर्मा, नरहरी माळवे, हर्षित आढाव, स्वप्नील वाघमारे यांच्यासह बजरंग दलाचे कार्यकर्ते उपस्थित होते.