पिंपरी, ता. ४ ः महापालिका आणि टाटा स्ट्राईव्ह यांच्यातर्फे ‘सक्षमा’ प्रकल्पांतर्गत दिवाळीत फराळ व विविध वस्तूंचे विक्री केंद्र १७ ठिकाणी उभारले होते. त्यात शंभरहून अधिक महिला स्वयं-सहाय्यता बचत गटांनी सहभाग घेतला. त्यांची तीन लाखांहून अधिक उलाढाल झाली.
बचत गटांनी बनवलेले फराळ व अन्य वस्तू विक्री, ब्रँडिंग व प्रसिद्धीसाठी महापालिकेने व्यासपीठ उपलब्ध करून दिले होते. त्याची विक्री, मांडणी व व्यवस्था ‘सक्षम’ फील्ड टीम व फेडरेशनने केली होती. त्याला ग्राहकांचा उत्स्फूर्त प्रतिसाद मिळाला. यामुळे सामाजिक व आर्थिकदृष्ट्या महिलांचे सशक्तीकरण होण्यास मदत झाली. शिवाय, महिलांना एक नवीन व्यावसायिक दिशा मिळाली असून त्यांचा आत्मविश्वास वाढला आहे. आगामी काळात या स्वयं-सहाय्यता गटांना आर्थिकदृष्ट्या पूर्णपणे स्वावलंबी बनवण्यासाठी महापालिकेच्या समाज विकास विभागाकडून विविध उपक्रम राबवण्याचे नियोजन आहे, अशी माहिती उपायुक्त ममता शिंदे यांनी दिली.