पिंपरी, ता. ५ : पुणे महानगर प्रदेश विकास प्राधिकरणाने (पीएमआरडीए) १५ नगररचना (टीपी) योजना प्रस्‍तावित केल्‍या आहेत. त्याला संबंधित गावांतून तीव्र विरोध होत आहे. या योजनांसाठी जमीन मोजणीला ग्रामस्थांनी थेट विरोध दर्शविला आहे. त्यामुळे ही प्रक्रिया संथ सुरू आहे. त्यामुळे या योजनांबाबत प्राधिकरण समिती बैठकीत निर्णय घेण्यात येणार आहे.

‘पीएमआरडीए’ने रिंगरोडलगत वाघोली, आव्हाळवाडी, मांजरी खुर्द १, २ आणि ३, वडकी (ता. हवेली), माण (मुळशी), धामणे, गोडुंब्रे, दारुंब्रे/साळुंब्रे १ आणि २, सांगवडे (ता. मावळ), नेरे आणि बावधन बु. (ता. मुळशी) या गावांसाठी एकूण १५ ‘टीपी’ योजना घोषित केल्या आहेत. जमिनी गेल्यानंतर योग्य मोबदला मिळणार नाही, अशी भीती ग्रामस्थांना आहे. अनेकांचे उपजीविकेचे साधन शेतीवर आधारित असल्याने त्यांनी तीव्र नाराजी व्यक्त केली आहे. प्रशासनाने यापूर्वी दोन वेळा ग्रामस्थांशी संवाद साधण्याचा प्रयत्न केला. पण, न तोडगा निघालेला नाही. आता प्राधिकरण समितीची बैठक घेऊन टीपी योजना पुढे राबवायची की थांबवायची, यावर निर्णय घेण्यात येणार आहे. पण, ही बैठक कधी होणार याबाबत प्रशासकीय स्तरावर नियोजन ठरलेले नाही.

जुन्या योजनांत रस्ते निर्मितीचे नियोजन
प्रशासनाने या पूर्वी वडाचीवाडी, औताडे–हांडेवाडी आणि होळकरवाडी या चार टीपी योजना मंजूर केल्या आहेत. त्याअंतर्गत रिंगरोडसाठी आवश्यक बहुतांश क्षेत्र ताब्यात घेण्यात आले आहे. तेथील गुंठेवारी विकासासाठी कार्यवाही सुरू होणार आहे. लवकरच निविदा प्रक्रिया राबवून प्रत्यक्ष रस्ते बांधकाम सुरू करण्याची तयारी प्रशासनाने केली आहे.