पिंपरी, ता. ८ : गेल्या अनेक महिन्यांपासून रखडलेली पिंपरी चिंचवड राष्ट्रवादी काँग्रेसची कार्यकारिणी अखेर मार्गी लागणार आहे. दोन दिवसांत कार्यकारिणी निवड जाहीर करण्यात येणार आहे. त्‍यासाठी पक्षाचे प्रमुख पदाधिकारी कामाला लागले आहेत. आगामी महापालिका निवडणुकीच्‍या तोंडावर ही निवड महत्‍वाची मानली जात आहे.
मुंबई येथे राष्ट्रवादी काँग्रेस पक्षाची बैठक उपमुख्यमंत्री अजित पवार यांच्‍या उपस्‍थित पार पडली. या बैठकीत शहरातील पदाधिकाऱ्यांनीही आपली मते व्‍यक्‍त केली. स्थानिक नेत्यांनी आपापली मते मांडल्यानंतर उपमुख्यमंत्री पवार यांनी मार्गदर्शन केले. महापालिका निवडणुकीच्या आरक्षण सोडतीनंतर पुन्हा बैठक घेऊन पुढील नियोजन निश्चित करण्यात येईल, असे सांगितले. बैठकीत पवार यांनी आगामी निवडणुकीसाठी तयारी करण्याचे, मतदार याद्या तपासण्याचे आणि एकजुटीने काम करण्याचे निर्देश दिले. तसेच शहरातील विविध विभागांची कार्यकारिणी तयार करून त्याला मंजुरी देण्यात आल्याचे बहल यांनी सांगितले.
विधानसभा निवडणुकीच्या काळात अनेक माजी नगरसेवकांनी पक्ष सोडला होता; मात्र ते पुन्हा राष्ट्रवादीत परतले आहेत. त्यामुळे नव्या कार्यकारिणीत त्यांच्या समर्थकांना स्थान मिळणार की तरुणांना नवीन संधी दिली जाणार ?, याकडे सर्वांचे लक्ष लागले आहे. येत्या महापालिका निवडणुकीच्या पार्श्वभूमीवर ही नवी कार्यकारिणी पक्षासाठी निर्णायक ठरणार आहे.