पिंपरी, ता. ९ : हिंजवडी परिसरातील काही दिवसांपूर्वी अतिक्रमणांवर कारवाई करण्यात आली. त्यानंतरही या परिसरांत पुन्‍हा अतिक्रमणे होण्याची शक्‍यता वर्तवली जात आहे. काही ठिकाणी पुन्‍हा अशा घटना आढळल्‍या आहेत. हे रोखण्यासाठी पुणे महानगर प्रदेश विकास प्राधिकरणाकडून (पीएमआरडीए) पुन्‍हा उपाययोजना राबविण्यात येणार आहेत. यासाठी हिंजवडीत पुन्‍हा सर्व्हेक्षण केले जाणार आहे.

हिंजवडी परिसरातील नागरी समस्या, वाहतूक कोंडी यासह अन्य तक्रारी अद्याप सुटलेल्या नाहीत. चार महिन्यांपूर्वी या ठिकाणी ‘पीएमआरडीए’सह अन्य शासकीय विभागांनी संयुक्‍त कारवाई करत अतिक्रमणे हटवली होती. हिंजवडी व परिसराच्या अवस्थेची दखल मुख्यमंत्री फडणवीस यांनीही दखल घेतली होती. पालकमंत्री अजित पवार यांनी जुलैमध्ये हिंजवडीचा दौरा करुन परिस्थितीचा आढावा घेतला. यानंतर खडबडून जागे झालेल्या एमआयडीसी, पीएमआरडीएने तातडीने अतिक्रमणविरोधी मोहीम हाती घेत रस्ते मोकळे केले होते. खड्डे बुजवत रस्त्यांची तात्पुरती डागडुजीदेखील केली होती.
कारवाईनंतर रस्ता रुंदीकरणाला गती देणे आवश्‍यक होते. ते न झाल्‍याने पुन्हा या भागांत काही ठिकाणी अतिक्रमणे होताना दिसत आहे. ते रोखण्यासाठी ‘पीएमआरडीए’कडे तक्रारी केल्यानंतर या ठिकाणी पुन्हा सर्व्हेक्षण करण्यात येणार आहे. त्यानुसार अतिक्रमण विरोधी पथकाचे एक पथक या ठिकाणी गेल्या दोन दिवसांपासून दौऱ्यावर आहे.

हिंजवडी परिसरातील बहुतांश कामे ‘पीएमआरडीए’कडून पूर्ण झाली आहेत. तरी, या ठिकाणी असलेल्या काही समस्यांबाबत पुन्हा एकदा या ठिकाणी पाहणी करण्यात येणार आहे. सर्वेक्षण झाल्यानंतर पुढील कार्यवाही करण्यात येईल.
- आशा होळकर, तहसीलदार, ‘पीएमआरडीए’