पिंपरी, ता. ११ : आजूबाजूला सार्वजनिक ठिकाण असतानाही स्पा सेंटरमध्ये बेकायदा वेश्याव्यवसाय चालविणारे पिंपरी सौदागर व काळेवाडी फाटा येथील दोन स्पा सेंटर पोलिसांकडून एक वर्षांसाठी बंद करण्यात आले आहेत. याबाबतचे आदेश पोलिस आयुक्त विनय कुमार चौबे यांनी दिले आहेत.
पिंपळे सौदागर येथील व्हीजन गॅलरी मॉलमधील न्यू ओम स्पा व कस्पटे वस्ती, वाकड काळेवाडी फाटा, कस्पटे वस्ती येथील रिपेन स्पा येथे सेंटरच्या नावाखाली वेश्याव्यवसाय सुरू असल्याची माहिती मिळाल्याने येथे गुन्हे शाखेच्या अनैतिक मानवी वाहतूक प्रतिबंध कक्षाच्या पथकाने छापा टाकला.
या प्रकरणी अनुक्रमे सांगवी व वाकड पोलिस ठाण्यात गुन्हा दाखल झाला. हे स्पा सेंटर बंद होण्याबाबतचा प्रस्ताव संबंधित पोलिस ठाण्याच्या निरीक्षकांनी पोलिस आयुक्तांकडे सादर केला.
या प्रस्तावांची दखल घेऊन पोलिस आयुक्त विनय कुमार चौबे यांनी या गुन्ह्यातील कागदपत्रांचे अवलोकन व प्राथमिक चौकशी केल्यानंतर हे दोन्ही स्पा सेंटर चालक मालक यांनी त्यांच्या स्पा सेंटरच्या आजूबाजूला सार्वजनिक ठिकाण असतानाही त्यांचे स्पा सेंटरमध्ये वेश्याव्यवसाय चालवल्याचे स्पष्ट झाले. त्यामुळे त्यांनी हे स्पा सेंटर एक वर्षांसाठी बंद करण्याबाबतचे आदेश दिले.