रावेत, ता. १० : मागील तीन वर्षांपासून सार्वजनिक वाहतूक व्यवस्था सुलभ करण्यासाठी तयार करण्यात आलेला मुकाई चौक - निगडी बीआरटी मार्ग रखडला आहे. त्यामुळे पीएमपी बससेवा विस्कळीत होत असून बसना बीआरटी मार्गाऐवजी बाहेरील रस्त्यावरुन जावे लागत आहे. त्याने वाहतूक कोंडीत भर पडत आहे.
मुकाई चौक ते निगडी या बीआरटी मार्गावर आधुनिक बस स्थानके, डिजीटल डिस्प्ले बोर्ड, रिझल-टाइम बस आगमनाची माहिती, व्हीलचेअर सुलभ सुविधा, सायकल पार्किंग आणि सीसीटीव्ही कॅमेरे अशी व्यवस्था करण्यात येत आहे. धर्मराज उड्डाणपुलावर हा बीआरटी मार्ग जातो. मात्र, सध्या त्याचे काम अपूर्ण असल्याने बीआरटीचा कुठलाच भाग सार्वजनिक वाहतुकीसाठी वापरात नाही. सध्या दुर्गादेवी टेकडी चौक आणि म्हस्के वस्ती येथील बसथांबे, रस्त्याचे डांबरीकरण आणि लोखंडी कठडे बसविण्याचे काम सुरू आहे.
हा मार्ग खुला कधी होणार ? याची विद्यार्थी, प्रवासी, ज्येष्ठ नागरिक तसेच चाकरमानी प्रवासी अनेक महिन्यांपासून प्रतिक्षा करत आहेत. नागरिकांना मोठा त्रास सहन करावा लागत असल्याने त्यांची नाराजी वाढत आहे. या संदर्भात महापालिका प्रशासन आणि बीआरटीएस विभागाच्या अधिकाऱ्यांना संपर्क केला असता संपर्क झाला नाही.
वेळ, खर्चातही बचत
बीआरटी मार्ग खुला करण्यास विलंब होत असल्यामुळे बाहेरील रस्त्यावर वाहतूक कोंडी वाढली आहे.
हा मार्ग सुरू झाल्यास प्रवासाचा वेळ, खर्च आणि वाहतूक कोंडी या तीनही बाबींमध्ये मोठा फरक पडेल. तसेच पीएमपी बससेवेला गती मिळून वाहतूक व्यवस्थेत सुधारणा होईल, असे प्रवासी संघटनांचे म्हणणे आहे.
स्थानिक नागरिक शाम बन म्हणाले, ‘‘बीआरटी मार्ग त्वरित पूर्ण झाल्यास पीएमपी बससाठी स्वतंत्र मार्ग उपलब्ध होईल. त्यामुळे कोंडी आणि अपघाताचे प्रमाण कमी होईल. प्रशासनाने या कामाकडे गांभीर्याने लक्ष देऊन तातडीने काम पूर्ण करावे.’’
रावेतपासून निगडी येथे जाण्यासाठी खूप कमी सार्वजनिक वाहतूक सेवा उपलब्ध आहे. बीआरटी मार्ग सुरू झाल्यास प्रवास सोपा आणि स्वस्त होईल.
- योगेश बरकले, प्रवासी
मी अनेक वेळा या मार्गावरील वाहतूक कोंडीत सापडलो आहे. वाहनांच्या गर्दीमुळे पदपथावरून चालणे अवघड होत आहे. बीआरटी मार्ग सुरू झाल्यास आम्हाला उपयुक्त ठरेल प्रशासनाने विलंब टाळावा.
- सुनील वाळिंबे, ज्येष्ठ नागरिक
मी रोज या मार्गाने माझ्या कार्यालयाला जाते. सकाळी आणि सायंकाळी मोठ्या प्रमाणात वाहतूक कोंडी होते. सार्वजनिक वाहतूक सुधारण्यासाठी बीआरटी लवकर सुरू करावी.
- अनिता चव्हाण, दुचाकी चालक
बीआरटी रस्त्याचे काम सुरू असल्यामुळे वाहतूक कोंडी होत आहे. बीआरटी मार्गिका सुरू झाल्यास वाहतूक कोंडीमधून सुटका होईल. हा रस्ता लवकर सुरू करावा.
- सुदाम पचुरकर, पोलिस निरीक्षक (वाहतूक), निगडी पोलिस ठाणे
बीआरटी मार्गाची वैशिष्ट्ये
- जलद प्रवासासाठी स्वतंत्र मार्ग
- प्रवाशांच्या सुरक्षेसाठी अत्याधुनिक प्रणाली
- अपंगांसाठी सुलभता
- डिजिटल माहिती प्रणालीचा समावेश
PNE25V38841
सकाळ+ चे सदस्य व्हा
ब्रेक घ्या, डोकं चालवा, कोडे सोडवा!
शॉपिंगसाठी 'सकाळ प्राईम डील्स'च्या भन्नाट ऑफर्स पाहण्यासाठी क्लिक करा.
Read latest Marathi news, Watch Live Streaming on Esakal and Maharashtra News. Breaking news from India, Pune, Mumbai. Get the Politics, Entertainment, Sports, Lifestyle, Jobs, and Education updates. And Live taja batmya on Esakal Mobile App. Download the Esakal Marathi news Channel app for Android and IOS.