पिंपरी, ता. १२ ः मराठीला अभिजात भाषेचा दर्जा मिळाला आहे. त्यानंतर पिंपरी चिंचवड महापालिकेनेही मराठीच्या संवर्धनासाठी विविध उपक्रम हाती घेतले असून स्वतंत्र अधिकाऱ्यांची नियुक्ती केली आहे. शिवाय, विविध साहित्यिक उपक्रम राबविले जात असून ‘माय मराठीसाठी एक पाऊल पुढे’ टाकण्याचे काम केले आहे. त्यात आता आणखी भर पडणार आहे.
महापालिकेचे कामकाज मराठीमधून चालते. सर्वसाधारण सभा असो स्थायी समिती सभा सर्व कामकाज, विषय पत्रिका (अजेंडा), ठराव मराठीतून मांडले जात आहेत. निविदा अथवा मनुष्यबळ भरती प्रक्रियेसाठीही मराठीला प्राधान्य दिले जात आहे. १५ मे रोजी शहराचा प्रारूप विकास आराखडा प्रसिद्ध केला आहे. तो पूर्णतः इंग्रजीत होता. तो मराठीत करण्याची मागणी नागरिकांसह विधी महाविद्यालयाच्या विद्यार्थ्यांनी केली होती. त्यावर सरकारनेही मान्यता देत पिंपरी चिंचवड शहराचा ‘डीपी’ मराठी भाषेत प्रसिद्ध करण्याचा आदेश दिला होता. त्यानुसार कार्यवाही सुरू आहे. आता राज्य सरकारच्या मराठी भाषा विभागाच्या आदेशानुसार तीन ते नऊ ऑक्टोबर या काळात अभिजात मराठी भाषा दिनानिमित्त अभिजात मराठी भाषा सप्ताह साजरा केला जाणार आहे.

मराठीच्या संवर्धनासाठी...
- मराठी भाषा संवर्धन समिती नियुक्त
- मराठी भाषा समन्वय तथा विशेष अधिकारी
- महापुरुषांची जयंती, पुण्यतिथीनिमित्त कथा, कविता, व्याख्यान असे साहित्यिक उपक्रम
- दिवाळी पहाटसारख्या कार्यक्रमातून मराठीचा जागर
- साहित्यिकांची बैठक घेऊन संकल्पना जाणून घेणे

महापालिकेचे प्रयत्न...
- अभिजात मराठी भाषा ग्रंथ परंपरेची विद्यार्थी व सामान्य जनतेला ओळख होण्यासाठी मराठी ग्रंथ व साहित्यांचे प्रदर्शन
- अभिजात मराठी भाषेतील प्राचीन ग्रंथ संपदेचे समकालीन मराठीत अनुवाद केलेल्या पुस्तकांचे प्रदर्शन व विक्री
- शाळा व महाविद्यालयांमध्ये मराठी भाषेसंदर्भात प्रश्नमंजूषा, निबंध लेखन, वकृत्व अशा विविध स्पर्धांचे आयोजन
- अभिजात मराठी भाषेशी संबंधित इतर नाविन्यपूर्ण उपक्रम राबविणे

पिंपरी चिंचवड महापालिका हद्दीत मराठी भाषेचा प्रचार, प्रसार व संवर्धन करणारे विविध उपक्रम राबविण्याचे नियोजन महापालिकेने केले आहे. त्या अनुषंगाने विचार विनिमय करण्यासाठी, मराठी भाषेच्या जतन व संवर्धनासाठी कार्य करणाऱ्या संस्था व संघटनांचे पदाधिकारी, प्रतिनिधी यांच्यासमवेत बैठक घेतली. अभिजात मराठी भाषा सप्ताह आयोजित करण्याच्या निमित्ताने साहित्यिकांच्या संकल्पना जाणून घेतल्या.
- तृप्ती सांडभोर, अतिरिक्त आयुक्त, महापालिका

अभिजात मराठी भाषा दिन आणि अभिजात मराठी भाषा सप्ताह काळात राज्य सरकारच्या मार्गदर्शक सूचनांनुसार अभिजात मराठी भाषा संदर्भात तज्ज्ञ व्यक्तींची व्याख्याने, चर्चासत्रे, परिसंवाद, कार्यशाळा, शिबिरे आयोजित केली जाणार आहेत. अभिजात मराठी भाषा ग्रंथ परंपरेची विद्यार्थी व सामान्य जनतेला ओळख करून देण्याचा प्रयत्न केला जाणार आहे.
- किरण गायकवाड, मराठी भाषा समन्वय तथा विशेष अधिकारी, महापालिका