पिंपरी, ता. १६ ः पिंपरी-चिंचवड शहर आणि हिंजवडी राजीव गांधी माहिती तंत्रज्ञान पार्क यांच्या मध्यवर्ती असलेल्या हिंजवडी, वाकड, ताथवडे, पुनावळे, किवळे, रावेत, मामुर्डी आणि जांबे या भागांमध्ये बांधकाम क्षेत्रात मोठी गुंतवणूक होत आहे. विस्तीर्ण रस्ते, बीआरटी मार्ग, पुणे मेट्रोचे प्रस्तावित जाळे तसेच मुंबई-बंगलोर महामार्गाची उत्तम कनेक्टिव्हिटी अशा विविध जमेच्या बाजू असल्यामुळे प्रीमियम प्रॉपर्टीची खरेदी करण्याकडे नागरिकांचा कल वाढला आहे.
विशेषतः: हिंजवडी आयटी पार्कमुळे मोठ्या प्रमाणात आयटी व्यावसायिक येथे स्थायिक होण्यास उत्सुक आहेत. त्यांना कार्यालयाजवळच दर्जेदार आणि प्रशस्त घरे मिळावीत, यासाठी बांधकाम व्यावसायिक विविध पर्याय उपलब्ध करून देत आहेत. केवळ घरच नाही तर वाढत्या लोकसंख्येमुळे शॉप, ऑफिस स्पेस तसेच इतर व्यावसायिक गरजांसाठी कमर्शियल प्रॉपर्टींची मागणीही मोठ्या प्रमाणावर वाढली आहे.
पश्चिम पिंपरी-चिंचवड भागातील नव्या प्रकल्पांमध्ये आधुनिक सुविधा, क्लबहाउस, पार्किंग, सुरक्षा व्यवस्था, ग्रीन झोन यांसारख्या सुविधा दिल्या जात आहेत. शहरी जीवनशैली आणि निसर्गाचा संगम मिळणाऱ्या या भागामुळे गुंतवणुकीसाठी हे प्रकल्प अधिक आकर्षक ठरत आहेत.
नवीन बांधकाम व्यावसायिक देखील या भागात गुंतवणूक करण्यास प्राधान्य देत असून पायाभूत सुविधांच्या वाढत्या जाळ्यामुळे येत्या काही वर्षांत या भागातील प्रॉपर्टींचे दर वाढण्याची शक्यता तज्ज्ञांनी व्यक्त केली आहे. त्यामुळे घर खरेदी अथवा व्यावसायिक प्रॉपर्टीमध्ये गुंतवणुकीसाठी पश्चिम पिंपरी-चिंचवड परिसर हा सर्वाधिक लाभदायक पर्याय ठरत आहे.
---
जमेच्या बाजू
१. या भागातून आयटी क्षेत्रात जाण्यासाठी दहाच मिनिटांचा अवधी
२. रस्ते मोठे केले जात असल्यामुळे भविष्यात अंतर आणखी कमी होणार
३. जवळच दर्जेदार शाळा, महाविद्यालये, रुग्णालये, क्रीडा मैदाने, बीआरटी बस स्थानके
४. एक किलोमीटर अंतरात सर्व सोईसुविधा उपलब्ध असल्यामुळे या भागात घर घेणे सोयीचे
------
रावेत-चाकण मेट्रोमुळे अंतर्गत कनेक्टिव्हिटी
हिंजवडी परिसरात काही दिवसांतच शिवाजीनगर-हिंजवडी मेट्रो धावणार आहे. यामुळे या भागातील वाहतुकीस मोठा दिलासा मिळणार आहे. त्याचबरोबर रावेत ते चाकण या ४१ किलोमीटर नवीन मेट्रो मार्गाचा विकास आराखडा (डीपी) तयार करण्यात आला आहे. या मार्गावर निगडी भक्ती-शक्ती, मुकाई चौक, रावेत, पुनावळे गाव, ताथवडे, भूमकर चौक, भुजबळ चौक, विशालनगर, कोकणे चौक, पिंपळे सौदागर मार्गे नाशिक फाटा व आळंदी फाटा अशी महत्त्वाची स्थानके येणार असून, हा मार्ग थेट चाकणपर्यंत जाईल. यामुळे हिंजवडी, वाकड, ताथवडे, पुनावळे, किवळे, रावेत, मामुर्डी आणि जांबे हा संपूर्ण पश्चिम पट्टा मेट्रोशी जोडला जाणार आहे. आयटी पार्क, औद्योगिक क्षेत्र आणि निवासी भागांना थेट मेट्रो कनेक्टिव्हिटी मिळाल्याने प्रवास सुलभ होणार असून, वेळ आणि खर्च दोन्हीची बचत होणार आहे. पायाभूत सुविधांमध्ये होत असलेल्या या मोठ्या गुंतवणुकीमुळे नागरिकांचा कल घर खरेदीकडे वाढला आहे.
---------