पिंपरी,ता. १५ ः पिंपरी चिंचवड शहरातील काही भागांमध्ये पावसाने बुधवारी (ता.१५) जोरदार हजेरी लावली. पाऊस उघडल्याने गेल्या काही दिवसांपासून कडक ऊन पडत होते. कमाल तापमानातही वाढ झालेली दिसून आली. मात्र, बुधवारी सकाळपासूनच ढगाळ वातावरण होते. त्यामुळे, उकाडाही वाढलेला होता. चारच्या सुमारास शहरातील निगडी, आकुर्डी, पिंपरी, चिंचवड, थेरगाव या भागांमध्ये जोरदार पावसाच्या सरी बरसल्या. यासोबतच उपनगरातील काही भागांतही पावसाने हजेरी लावली. त्याने दिवसभर जाणवणाऱ्या उकाड्यापासून नागरिकांना दिलासा मिळाला. मात्र, दिवाळीच्या खरेदीसाठी बाहेर पडलेल्या नागरिकांची तारांबळ उडाली. सध्या शहरात फटाके, पणत्या, आकाशदिवे, रांगोळ्या विक्रेत्यांचे स्टॉल मोठ्या प्रमाणावर लागलेले आहेत. मात्र, अचानक आलेल्या पावसामुळे विक्रेत्यांचीही धांदल उडाली.