पिंपरी, ता. १८ ः चऱ्होलीतील प्रस्तावित नगर रचना योजना (टीपी स्कीम) रद्द करण्याची घोषणा मुख्यमंत्री देवेंद्र फडणवीस यांनी केली. दरम्यान, मुख्यमंत्री बुधवारी (ता. १८) शहर दौऱ्यावर असताना चऱ्होली टीपी रद्द करण्याच्या मागणीसाठी स्थानिक नागरिकांनी पाण्याच्या टाकीवर चढून आंदोलन करत प्रशासनाचे लक्ष वेधले. तसेच आमदार महेश लांडगे यांनीही ‘टीपी’ रद्दची मागणी केली होती.
पिंपरी चिंचवड महापालिका प्रशासनाने चऱ्होलीतील एक हजार ४२५ हेक्टर क्षेत्रावरील पाच भूखंडांवर आणि चिखलीतील ३८० हेक्टर क्षेत्रावर ‘टीपी’ प्रस्तावित केला होता. त्याची जाहीर नोटीस २९ एप्रिल रोजी जाहीर करून हरकती व सूचना मागवल्या होत्या. मात्र, ‘टीपी’ जाहीर होताच दोन्ही गावांतील भूमिपुत्र, जागा मालकांसह भाजप आमदार महेश लांडगे यांनी विरोध दर्शवला होता. त्यानंतर चिखली ‘टीपी’ रद्द केल्याचे आयुक्त शेखर सिंह यांनी जाहीर केले. मात्र, चऱ्होली ‘टीपी’ कायम ठेवला होता. त्याला तीव्र विरोध करत स्थानिक नागरिकांनी आंदोलनेही केली. त्यानंतर ‘चऱ्होली टीपी’ स्थगित करण्याचा निर्णय आयुक्तांनी घेतला. मात्र, ‘टीपी’ रद्दची मागणी आमदार लांडगे यांच्यासह भूमिपुत्रांची होती. ‘सकाळ’नेही ‘टीपी’बाबत ‘चिखलीला न्याय; चऱ्होलीवर अन्याय’ अशा आशयाचे वृत्त प्रसिद्ध करून ‘टीपी’ रद्द करण्याबाबत पाठपुरावा केला होता. त्याची दखल घेऊन मुख्यमंत्री फडणवीस यांनी बुधवारी (ता. १८) शहर दौऱ्यावर असताना ‘चऱ्होली टीपी’ रद्द करण्याची घोषणा करत आयुक्तांना आदेश दिला. नागरिकांना विश्वासात घेतल्याशिवाय शहराचा सुनियोजित विकास करता येणार नाही. त्यामुळे नागरिकांनी संभ्रम करण्याची आवश्यकता नाही, असा विश्वासही त्यांनी दिला. दरम्यान, आमदार लांडगे यांनी चिखलीत आयोजित मुख्यमंत्र्यांचे जाहीर कार्यक्रमात लक्ष वेधले होते.

पिंपरी चिंचवडकरांच्या न्याय हक्कांसाठी मुख्यमंत्री देवेंद्र फडणवीस यांनी कायम प्राधान्य दिले आहे. चिखली टीपी रद्द झाल्याने राजकीय संधीसाधूंनी भूमिपुत्र, शेतकरी आणि ग्रामस्थांमध्ये संभ्रम निर्माण करण्याचा प्रयत्न केला होता. त्यावर मुख्यमंत्र्यांनी ‘एक घाव दोन तुकडे’ केल्याची भूमिका घेत चऱ्होली टीपी रद्दची घोषणा केली. भूमिपुत्र आणि ग्रामस्थांच्या एकजुटीचा हा विजय आहे. मुख्यमंत्री फडणवीस यांचे मनापासून आभार व्यक्त करतो.
- महेश लांडगे, आमदार, भाजप, भोसरी

टाकीवर चढून आंदोलन
चऱ्होली ः चऱ्होली ‘टीपी’ रद्द करण्याच्या मागणीसाठी भूमिपुत्रांनी ग्रामदैवत वाघेश्वर महाराज मंदिर परिसरातील पाण्याच्या टाकीवर चढून बुधवारी आंदोलन केले. यामध्ये पंडितराव तापकीर, मंगेश माटे, अनिल तापकीर, सुनील पठारे, श्री वाघेश्वर मंदिराचे विश्वस्त ज्ञानेश्वर पठारे, सूरज दाभाडे, योगेश भोसले, बजरंग काळजे, शरद काटे, श्रेयस चिखले, नितीराज कोतवाल, प्रसाद कोतवाल, विपुल तापकीर, राहुल रासकर, सुनील पठारे, सागर तापकीर, तानाजी तापकीर, कुणाल तापकीर यांचा समावेश होता.