पिंपरी, ता. २८ : नमस्कार फाउंडेशनच्या तीन ते सात डिसेंबरदरम्यान ‘नमस्कार महोत्सव २०२५’ चे आयोजन करण्यात आले आहे. या महोत्सवात विविध सांस्कृतिक व मनोरंजनात्मक कार्यक्रमांसह आरोग्य शिबिराचेही आयोजन करण्यात आले आहे.
आकुर्डी प्राधिकरण येथील महापौर निवासाच्या नियोजित जागेत होणाऱ्या या महोत्सवात ज्येष्ठ नागरिकांचे स्नेहसंमेलन, हिंदी, मराठी चित्रपटातील गाण्यांचा कार्यक्रम या सांस्कृतिक कार्यक्रमासोबतच ‘हास्ययात्रा’ आणि ‘हसवणूक’ हे एकपात्री प्रयोग तसेच ‘करून गेलो गाव’, ‘हीच खरी फॅमिलीची गंमत आहे’ या दर्जेदार नाटकांची मोफत मेजवानी प्रेक्षकांना मिळणार आहे. ही माहिती फाउंडेशनचे संस्थापक अध्यक्ष सुहास जोशी यांनी दिली.
यावर्षी आयोजित केलेले सर्व सांस्कृतिक उपक्रम नागरिकांसाठी मोफत आहेत. सायंकाळी ७ वाजल्यापासून कार्यक्रमांना सुरूवात होईल. तर, पाचही दिवस दुपारी ३ ते सायंकाळी ६ वाजेपर्यंत मधुमेह व सांधेदुखीमुक्त शहर अभियानांतर्गत आयुर्वेदाचा प्रचार व प्रसार करण्यात येईल. त्याच बरोबर डिजिटल पद्धतीने नाडी तपासणी, कांस्य थाळी मसाज, ॲक्युप्रेशर, मधुमेह, रक्तदाब तपासणी, उपचार व मार्गदर्शन या सुविधा उपलब्ध करून देण्यात येणार आहेत, असे जोशी यांनी सांगितले.