पिंपरी, ता. १ ः जागतिक दिव्यांग दिनानिमित्त महापालिकेच्या समाज विकास विभागाने बुधवारी (ता. ३) दिव्यांग बांधवांसाठी विविध कार्यक्रमांचे आयोजन केले आहे. चिंचवड येथील प्रा. रामकृष्ण मोरे प्रेक्षागृहात सकाळी ११ ते सायंकाळी सात या वेळेत होणाऱ्या कार्यक्रमासह नवीन योजनांचे उद्घाटन आयुक्त श्रावण हर्डीकर यांच्या हस्ते होणार आहे. त्यानंतर दिव्यांगांसाठी उल्लेखनीय काम करणाऱ्या सामाजिक संस्था, विशेष प्रावीण्य प्राप्त दिव्यांग नागरिक व विद्यार्थी यांचा सन्मान होईल. सकाळी १० ते दुपारी १२ पर्यंत यूडीआयडी, आधार आणि शिधापत्रिका दुरुस्ती केंद्र दिव्यांग बांधवांसाठी सुरू राहील. त्यानंतर सांस्कृतिक कार्यक्रम होईल. दिव्यांग कल्याणकारी योजना, उद्योग उभारणी आदींबाबत मार्गदर्शन केले जाईल, अशी माहिती समाज विकास विभागाच्या उपायुक्त ममता शिंदे यांनी दिली.