पिंपरी, ता. १८ : चऱ्होली वडमुखवाडी तापकीरनगर परिसरातील विहिरीत बैल पडला होता. महापालिकेच्या चोविसावाडी उपअग्निशमन केंद्रातील पथकाने स्थानिकांच्या मदतीने क्रेनच्या सहाय्याने बैलाला बाहेर काढून प्राण वाचवले.
अग्निशमनचे जवान अमोल रांजणे, विशाल पोटे, ऋषिकेश रांजणे, शुभम बोराडे, संस्कार चव्हाण, सचिन ठोसरे यांनी सहभाग घेतला. अग्निशामक अधिकारी ऋषिकांत चिपाडे म्हणाले, ‘‘घटना समजताच आमच्या पथकाने तत्काळ कारवाई केली आणि स्थानिकांच्या मदतीने बचावकार्य यशस्वीरीत्या पूर्ण केले. विहिरीचा खोली अधिक असल्याने आणि बैल घाबरलेला असल्याने आव्हान वाढले होते. परंतु प्रशिक्षित जवानांच्या मदतीला स्थानिकांचे सहकार्य मिळाले.’’