पिंपरी, ता. १५ : पिंपरी चिंचवड महापालिकेच्या निवडणुकीची रणधुमाळी सुरू झाली आहे. १५ जानेवारी रोजी होणारी ही निवडणूक शांततापूर्ण व पारदर्शक वातावरणात पार पाडण्यासाठी महापालिका प्रशासन सज्ज झाले आहे. निवडणूक प्रक्रियेच्या अंमलबजावणीसाठी स्वतंत्र निवडणूक कार्यालयांची रचना करण्यात आली आहे.
पिंपरी चिंचवड महापालिकेसाठी ३२ प्रभागांतून १२८ जागांसाठी ही निवडणूक होत आहे. निवडणूक लढविणाऱ्या प्रत्येक उमेदवारासाठी १३ लाख रुपये खर्चाची मर्यादा निश्चित आहे. तसेच, बहुसदस्यीय पद्धतीनुसार प्रत्येक मतदाराला चार मते देण्याचा अधिकार असणार आहे. संपूर्ण निवडणूक व्यवस्थापनासाठी चार प्रभागांना एक, या प्रमाणे ३२ प्रभागांसाठी आठ निवडणूक निर्णय अधिकाऱ्यांची नियुक्ती करण्यात आली आहे. नागरिकांसाठी मतदार याद्या पिंपरीतील ज्ञानज्योती सावित्रीबाई फुले स्मारकासह सर्व क्षेत्रीय कार्यालयांत पाहण्यासाठी उपलब्ध करुन देण्यात आल्या आहेत.

अशी आहे आकडेवारी
शहरातील एकूण मतदार : १७ लाख १३ हजार ८९१
पुरुष मतदार : ९ लाख ५ हजार ७२८
महिला मतदार : ८ लाख ७ हजार ९६६
इतर मतदार : १९७
मतदान केंद्र : २ हजार ४४
(माहिती स्रोत : महानगरपालिका प्रशासन, संदर्भ : २०११ जनगणना)

असा आहे निवडणूक कार्यक्रम
- नामनिर्देशन पत्र दाखल करण्यासाठी : २३ ते ३० डिसेंबर
- पारंपरिक (ऑफलाइन) स्वरुपात नामनिर्देशन पत्र स्वीकारले जाणार
- नामनिर्देशन पत्रांची छाननी : ३१ डिसेंबर
- उमेदवारी अर्ज माघारीसाठी : २ जानेवारी मुदत
- चिन्ह वाटप आणि अंतिम उमेदवारांची यादी : ३ जानेवारी
- प्रत्यक्ष मतदान प्रक्रिया : १५ जानेवारी
- मतमोजणी आणि निकाल : १६ जानेवारी

निवडणूक निर्णय अधिकारी कार्यालये

प्रभाग क्रमांक आणि निवडणूक कार्यालय
१०, १४, १५, १९ : स्थानिक संस्था कर कार्यालय, हेडगेवार भवन, प्राधिकरण, निगडी
१६, १७, १८, २२ : ‘ब’ क्षेत्रीय कार्यालय, लिंक रोड, एल्प्रो मॉलच्या मागे, चिंचवडगाव
२, ६, ८, ९ : ‘क’ क्षेत्रीय कार्यालय, पॉलिग्रास हॉकी स्टेडियमजवळ, एमआयडीसी, भोसरी
२५, २६, २८, २९ : ‘ड’ क्षेत्रीय कार्यालय, औंध-रावेत बीआरटी रोड, रहाटणी
३, ४, ५, ७ : कबड्डी प्रशिक्षण संकुल, अंकुशराव लांडगे नाट्यगृहाच्या मागे, भोसरी
१, ११, १२, १३ : सेक्टर १७/१९, स्पाइनरोड शेजारी, घरकुल चिखली टाउन हॉल
२१, २३, २४, २७ / ‘ग’ क्षेत्रीय कार्यालय, वेंगसरकर अकादमीमागे, थेरगाव
२०, ३०, ३१, ३२ : पिंपरी चिंचवड बॅडमिंटन हॉल, पीडब्ल्यूडी मैदान, सांगवी

महापालिका निवडणुकीच्या पार्श्वभूमीवर आदर्श आचारसंहिता लागू करण्यात आली आहे. तिचे काटेकोर पालन होणे आवश्यक आहे. आचारसंहितेचा भंग होणार नाही, यासाठी सर्व यंत्रणांनी आणि नागरिकांनी सजग राहावे. तसेच, मतदानाचा टक्का वाढविण्यासाठी जनजागृती व स्वीप मोहीम प्रभावीपणे राबविली जात आहे.
- श्रावण हर्डीकर, महापालिका आयुक्त तथा निवडणूक निर्णय अधिकारी