पिंपरी, ता. १५ : पवना आणि इंद्रायणी या दोन्ही नद्यांच्या संवर्धन व स्वच्छतेसाठी हाती घेतलेला महत्त्वाकांक्षी नदी सुधार प्रकल्प आता निर्णायक टप्प्यात आला आहे. या प्रक्रियेत पाठपुरावा करणारे आणि विषयाला गती देणारे नेतृत्व म्हणून आमदार महेश लांडगे यांची भूमिका महत्त्वाची ठरली आहे.
मुख्यमंत्री देवेंद्र फडणवीस यांनी पिंपरी चिंचवड महापालिका हद्दीतील इंद्रायणी नदी सुधार प्रकल्पासाठी ५२६ कोटी रुपयांचा निधी मंजूर केला होता. आता पुणे महानगर प्रदेश विकास प्राधिकरणामार्फत (पीएमआरडीए) पवना व इंद्रायणी नद्यांच्या संवर्धनासाठी सुमारे एक हजार कोटी रुपयांच्या विविध निविदा प्रक्रिया प्रसिद्ध केल्या आहेत. त्यामुळे उगम ते संगम पवना व इंद्रायणी दोन्ही नद्यांच्या किनारी आवश्यक ठिकाणी सांडपाणी प्रक्रिया प्रकल्प (एसटीपी), मलनि:सारण योजना, प्रदूषण नियंत्रण व नदी पुनरुज्जीवनाची कामे समाविष्ट आहेत.
आमदार लांडगे यांनी ‘नमामि इंद्रायणी’ व पवना नदी सुधार प्रकल्पचा विषय सातत्याने शासन दरबारी मांडला. मुख्यमंत्री फडणवीस यांनी या प्रकल्पाला सकारात्मक प्रतिसाद दिला. प्रशासकीय मान्यता, तांत्रिक मान्यता त्यानंतर केंद्र व राज्य सरकारच्या माध्यमातून निधी उपलब्ध करण्याबाबत पाठपुरावा सुरू आहे. यासाठी सुधारित सविस्तर प्रकल्प अहवाल (डीपीआर) करण्यात आला आहे.

‘पवना आणि इंद्रायणी नद्यांचे संवर्धन आणि स्वच्छता हा राजकीय विषय नसून येणाऱ्या पिढ्यांच्या आरोग्याचा आणि शहराच्या शाश्वत भवितव्याचा प्रश्न आहे. मुख्यमंत्री देवेंद्र फडणवीस यांच्या नेतृत्वात शासनाच्या सहकार्याने, तज्ज्ञांच्या मार्गदर्शनाखाली आणि नागरिकांच्या सहभागातून हा उगम ते संगम नदी सुधार प्रकल्प पिंपरी चिंचवड महापालिका, पुणे महापालिका आणि पीएमआरडीए यांच्या माध्यमातून निर्धारित वेळेत आणि प्रभावीपणे पूर्ण करण्यासाठी आम्ही कटिबद्ध आहोत.
- महेश लांडगे, आमदार, भोसरी