पिंपरी, ता. १७ : पुणे महानगर प्रदेश विकास प्राधिकरण (पीएमआरडीए) यांच्याकडून पुणे जिल्ह्यातील हवेली तालुक्यातील रस्त्यांच्या कामासाठी ई-निविदा मागविण्यात आल्या आहेत. या कामांमध्ये रस्त्यांचे काँक्रिटीकरण, खडीकरण तसेच आवश्यक दुरुस्ती व सुधारणा करण्याचा समावेश आहे.
पीएमआरडीएकडून हद्दीतील विविध तालुक्‍यातील रस्‍त्‍यांची कामे हाती घेतली आहेत. ई-निविदा अंतर्गत ही प्रक्रिया राबविण्यात येत आहे. संबंधित निविदेची सविस्तर माहिती व निविदा दस्तऐवज महाराष्ट्र शासनाच्या अधिकृत www.mahatenders.gov.in या संकेतस्थळावर उपलब्ध करून देण्यात आले आहेत. निविदा दस्तऐवज १३ डिसेंबर २०२५ रोजी सकाळी अकरापासून डाऊनलोड करता येणार असून, निविदा सादर करण्याची अंतिम मुदत २९ डिसेंबर २०२५ रोजी दुपारी पाच वाजेपर्यंत आहे.
निविदा प्रक्रियेत कोणताही बदल असल्यास त्याची माहितीही याच संकेतस्थळावर प्रसिद्ध केली जाणार असल्याचे पीएमआरडीएकडून स्पष्ट करण्यात आले आहे. या रस्ते विकासकामांमुळे हवेली तालुक्यातील वाहतूक सुलभ होण्यास मदत होणार असून, नागरिकांच्या दैनंदिन प्रवासातील अडचणी कमी होतील, अशी अपेक्षा व्यक्त करण्यात येत आहे.