पिंपरी, ता. १८ ः पिंपरी चिंचवड महापालिका निवडणुकीसाठी प्रारूप मतदारयादी प्रसिद्ध झाली होती. त्यात सुमारे ९२ हजार दुबार नावे आढळली. त्याबाबत पडताळणी सुरू आहे. ती पूर्ण झाल्यानंतर केंद्रीय स्तरीय याद्या आणि केंद्रांची संख्या तसेच ठिकाणे प्रसिद्ध केली जातील, अशी माहिती महापालिका आयुक्त तथा निवडणूक अधिकारी श्रावण हर्डीकर यांनी दिली.
राज्य निवडणूक आयोगाच्या मान्यतेनुसार महापालिकेची अंतिम प्रभाग रचना सहा ऑक्टोबर रोजी अधिसूचनेद्वारे प्रसिद्ध झाली. चार सदस्यांचा एक याप्रमाणे १२८ जागांसाठी ३२ प्रभागांची निर्मिती झाली आहे. यातील ५० टक्के अर्थात ६४ जागा महिलांसाठी राखीव आहेत. एकूण १७ लाख १३ हजार ८९१ मतदार आहेत. अंतिम मतदार याद्याही प्रसिद्ध झाल्या आहेत. मात्र, त्यातील दुबार नावांचा शहानिशा घरोघरी जाऊन करण्याचे काम सुरू आहे. त्यावर २२ डिसेंबरपर्यंत कार्यवाही केली जाणार आहे. मतदान केंद्रांची अधिकृत यादी शनिवारी (ता. २०) आणि मतदान केंद्रनिहाय मतदार यादी २७ डिसेंबर रोजी प्रसिद्ध केली जाणार आहे.
दुबार मतदारांबाबत आयुक्त हर्डीकर म्हणाले, ‘‘मतदार याद्यांवरील हरकती व सूचनांबाबत आलेल्या प्रत्येक अर्जावर कार्यवाही सुरू आहे. तक्रारींवर शंभर टक्के शहानिशा करून दुरुस्ती केली जाणार आहे. सुमारे ९२ हजार दुबार मतदार नावे आढळली आहेत. त्यावर घरोघरी जाऊन खात्री करून घेतली जाणार आहे. एकाच नावाच्या अनेक व्यक्ती आढळल्या आहेत, त्यामुळे दुबार मतदारांची संख्या जास्त आढळली आहे.’’
---

महापालिका निवडणुकीसाठी अंतिम मतदार यादीत ९२ हजार दुबार नावे आढळली आहेत. त्यात एकाच नावाच्या अनेक व्यक्ती आहेत. खरेच दुबार नावे असलेल्या व्यक्तींकडून ते नेमके कुठे व कोणत्या मतदान केंद्रावर मतदान करणार आहे, याबाबत लेखी माहिती घेतली जाणार आहे.
- श्रावण हर्डीकर, आयुक्त तथा निवडणूक अधिकारी, महापालिका
--