पिंपरी, ता. २० ः महापालिकेच्या आगामी निवडणुकीचे सर्वांनाच वेध लागले आहेत. राजकीय पक्षांनी कंबर कसली आहे. शहराच्या दृष्टीने काँग्रेसच्या हालचाली सुरू झाल्या आहेत. प्रदेशाध्यक्ष हर्षवर्धन सपकाळ यांनी नुकतीच समन्वय समिती स्थापन केली. आता काँग्रेसने इच्छुकांकडून उमेदवारी अर्ज मागवणे सुरू केले आहे. रविवारपर्यंत (ता. २१) उमेदवारी अर्ज सादर करण्याच्या सूचना देण्यात आल्या आहेत.
दरम्यान, अखिल भारतीय काँग्रेसचे सहप्रभारी बी. एम. संदीप यांचा निवडणुकीबाबत रविवारी दौरा होत आहे. परिणामी पक्षाने इच्छुकांकडून अर्ज मागविण्याच्या प्रक्रियेला सुरवात करत एक पाऊल पुढे टाकले. पिंपरी चिंचवड शहर जिल्हा काँग्रेस समितीमधील जे पक्षाचे पदाधिकारी व कार्यकर्ते नव्याने उमेदवारी अर्ज दाखल करू इच्छितात व ज्यांनी अगोदर पक्ष कार्यालयात अर्ज दाखल केला आहे आणि त्यासोबत ज्यांनी उमेदवारी अर्ज शुल्क भरले आहे, त्यांनी अर्ज व पावतीची प्रत महाराष्ट्र प्रदेश काँग्रेस समिती सरचिटणीस बाबू नायर यांच्‍या यशवंतनगर येथील जनसंपर्क कार्यालयात जमा करावी, असे कळविण्यात आले आहे.
इच्छुक उमेदवारांना संपूर्ण माहितीसह रविवारपर्यंत सकाळी १० ते सायंकाळी पाच या वेळेत अर्ज सादर करावे लागणार असल्याचे सरचिटणीस ॲड. अमित कारंडे यांनी पत्रकामध्ये नमूद केले. ज्यांनी आजवर उमेदवारी अर्ज सादर केलेले नव्हते, अशा सामान्य नागरिक, पक्ष पदाधिकारी व कार्यकर्ते यांनी वरील ठिकाणी उमेदवारी अर्ज नव्याने सादर करावेत, अशी महत्त्वाची सूचना देण्यात आली आहे.
-----