‘नाचू कीर्तनाचे रंगी’ ः लोगो
पिंपरी, ता. २६ : आषाढ महिना उजाडला की वेध लागतात आषाढी एकादशीचे. पंढरपूरच्या विठुरायाच्या दर्शनाचे. त्यासाठी राज्यभरातून वेगवेगळ्या संतांचे पालखी सोहळे पंढरपूरकडे मार्गस्थ झालेले असतात. मात्र, नोकरी- व्यवसायानिमित्त, कामानिमित्त अनेकांना इच्छा असूनही आषाढी वारीला जाता येत नाही. अशा भाविक भक्तांसाठी ‘सकाळ’ने दरवर्षीप्रमाणे यंदाही बुधवारपासून (ता. २ जुलै) ‘नाचू कीर्तनाचे रंगी’ कीर्तन महोत्सवाचे आयोजन केले आहे.
वारकरी संप्रदाय म्हटले की समोर येतात संतांच्या अभंग रचना. अवघ्या महाराष्ट्राचे दैवत असलेल्या पंढरीच्या पांडुरंगाची अर्थात विठ्ठल भक्ती. त्यात तल्लीन होऊन नाचणारा; भजन, प्रवचन, कीर्तनात दंग होणारा वारकरी, कीर्तनकार आणि श्रीविठ्ठल भक्त. याच विठ्ठलाची भक्ती परंपरा ‘नाचू कीर्तनाचे रंगी’ कीर्तन महोत्सवातून ‘सकाळ माध्यम समूह’ दोन जुलैपासून घेऊन येणार आहे. या वर्षीच्या महोत्सवाचा सुवर्णयोग म्हणजे संत ज्ञानेश्‍वर माऊलींचे ७५० वे अर्थात सप्तशतकोत्तर सुवर्ण महोत्सवी जन्मोत्सवी वर्ष आणि जगद्‍गुरू संत तुकाराम महाराज यांचे ३७५ वे अर्थात त्रिशतकोत्तर अमृतमहोत्सवी सदैव वैकुंठगमन वर्ष आहे. हा दुहेरी योग आणि आषाढी वारी असा त्रिवेणी संगम साधत ‘सकाळ’ने भक्तीचा कीर्तन सोहळा भाविकांच्या अंगणी आणला आहे.

प्रा. रामकृष्ण मोरे प्रेक्षागृहात आयोजन
आषाढी वारीनिमित्त ‘नाचू कीर्तनाचे रंगी’ कीर्तन महोत्सव चिंचवड येथील प्रा. रामकृष्ण मोरे प्रेक्षागृहात बुधवार (ता. २) ते रविवार (ता. ६ जुलै) या कालावधीत होणार आहे. पाच दिवसांच्या कीर्तन महोत्सवातील पहिले चार कीर्तन सायंकाळी पाच वाजता सुरू होतील. आषाढी एकादशी अर्थात सहा जुलै रोजी सकाळी दहा वाजता कीर्तन होईल.

कीर्तन महोत्सवाची रूपरेषा
- २ जुलै ः रामराव महाराज ढोक, नागपूर
- ३ जुलै ः जयवंत महाराज बोधले, पंढरपूर
- ४ जुलै ः रोहिणीताई माने-परांजपे, पुणे
- ५ जुलै ः उद्धव महाराज मंडलिक, नेवासेकर
- ६ जुलै ः सचिन महाराज पवार, पुणे
---
फोटो ः 26418, 26419, 26420, 26421, 26422