पिंपरी : पोलिसांच्या गुन्हे शाखेच्या पथकाने एका तरुणाकडून एक पिस्तूल व जिवंत काडतूस जप्त केले. ही कारवाई वाकड येथील चौधरी पार्क शेजारी करण्यात आली. अफताब मेहबूब शेख (वय २४, रा. यमुनानगर, वाकड) असे अटक केलेल्या आरोपीचे नाव आहे. आरोपी अफताब याच्‍याकडे पिस्तूल असल्याची माहिती पथकाला मिळाली. त्यानुसार पथकाने सापळा रचून शेख याला ताब्यात घेतले. त्याची अंगझडती घेतली असता त्याच्याकडे ५१ हजार रुपये किमतीचे पिस्तूल व एक जिवंत काडतूस सापडले. वाकड पोलिस अधिक तपास करीत आहेत.

टास्कच्या नावाखाली महिलेची ४३ लाखांची फसवणूक
पिंपरी : एक महिला ऑनलाइन जॉब शोधत असताना तिच्‍याशी संपर्क करून तिला टास्‍क दिले. त्‍यासाठी तिला तब्‍बल ४३ लाख ३१ हजार रुपयांची गुंतवणूक करण्‍यास भाग पाडून तिची आर्थिक फसवणूक केली. याप्रकरणी हिंजवडीतील ४५ वर्षीय महिलेने हिंजवडी पोलिस ठाण्‍यात फिर्याद दिली आहे. त्यानुसार दोन अज्ञात महिलांसह विविध बँक खातेधारकांवर गुन्‍हा दाखल झाला आहे. आरोपींनी फिर्यादीस टेलिग्रामद्वारे एका कंपनीचा एजंट असल्याचे भासवून एक लिंक पाठवली. त्यावर टास्क देवून पैसे गुंतवण्यास सांगितले. सुरुवातीला काही परतावा देऊन विश्वास संपादन केला. त्यानंतर ४३ लाख ३१ हजार ३३६ रुपये ऑनलाइन स्वरूपात घेऊन ते पैसे परत न करता महिलेची फसवणूक केली. हिंजवडी पोलिस अधिक तपास करीत आहेत.

ट्रेलर चालकाला रॉडने बेदम मारहाण
पिंपरी : वडमुखवाडी येथील पांडुरंग एंटरप्रायजेस गॅरेजसमोर पार्किंगमध्ये ट्रेलर घासल्याच्या कारणावरून चालकाला लोखंडी रॉड व बेल्टने मारहाण करण्यात आली. ही घटना वडमुखवाडी येथे घडली. याप्रकरणी दिनकर गहिनाथ वारे (रा. पांगरी, शिरूर कासार, जि. बीड) यांनी दिघी पोलिस ठाण्‍यात फिर्याद दिली आहे. त्यानुसार पोलिसांनी नीलेश महादेव गर्जे (वय २८, रा. हवालदार वस्ती, मोशी) याला अटक केली असून बाबू गोल्हार व त्‍याचे तीन साथीदार यांच्‍यावर गुन्हा दाखल केला आहे. वडमुखवाडी येथील पांडुरंग एंटरप्रायजेस गॅरेजसमोर पार्किंगमध्ये फिर्यादी यांचे ट्रेलर किरकोळ घासल्याच्या कारणावरून आरोपींनी फिर्यादी यांना शिवीगाळ, दमदाटी करीत रॉड व बेल्टने बेदम मारहाण केली. यामध्‍ये फिर्यादी ट्रेलरचालक गंभीर जखमी झाले. दिघी पोलिस अधिक तपास करीत आहेत.

गुटखा जप्त; एकाला अटक
पिंपरी : एका फ्लॅटमध्ये ६४ हजार १३० रुपये किमतीचा गुटखा साठवून ठेवल्याचे समोर आल्यानंतर पोलिसांनी कारवाई करून एकाला अटक केली. ही कारवाई हिंजवडी येथील साखरे वस्ती येथे करण्यात आली. तालब बुरेखान खान (वय ४२, रा. फ्लॅट नं. ३०१, साखरे वस्ती, हिंजवडी) याला अटक करण्यात आली आहे. साखरे येथील एका फ्लॅटमध्ये आरोपीने ६४ हजार १३० रुपये किमतीचा गुटखा साठवून ठेवल्याची माहिती पोलिसांना मिळाली. त्‍यानुसार पोलिसांनी छापा टाकून गुटखा जप्‍त केला. हिंजवडी पोलिस अधिक तपास करीत आहेत.
----