पिंपरी, ता. २७ ः महापालिका करआकारणी व करसंकलन विभागाने मालमत्ता कर भरणाऱ्यांसाठी जाहीर केलेल्या विविध सवलत योजनेचा लाभ घेण्याची अंतिम मुदत ३० जून आहे. त्यासाठी अवघे तीन दिवस शिल्लक आहे. नागरिकांच्या सोयीसाठी शनिवार (ता. २८) आणि रविवारी (ता. २९) या सार्वजनिक सुट्टीच्या दिवशीही सर्व करसंकलन कार्यालये सुरू राहणार आहेत.
महापालिकेने सिद्धी उपक्रमाअंतर्गत महिला बचत गटांच्या माध्यमातून सहा लाख ४० हजार मिळकतधारकांशी थेट संपर्क साधून व घरोघरी जाऊन मिळकतकराच्या बिलांचे वितरण केले आहे. शिवाय, थकबाकीदार मिळकतधारकांना जप्तीच्या नोटिसही बजावल्या आहेत. मिळकतकर ३० जूनपर्यंत भरल्यास सवलत योजनाही जाहीर केली आहे. त्यानुसार, ऑनलाइन पद्धतीने मिळकतकर भरणाऱ्यांना सर्वाधिक १० टक्क्यांपर्यंत आणि महिला मिळकतधारकांना (महिलांच्या नावावर मिळकत) ३० टक्क्यांपर्यंत सवलत मिळणार आहे. मात्र, एक जुलैपासून मिळकतकराच्या रकमेवर दोन टक्के विलंब शुल्क (दंड) भरावे लागणार आहे.

धनादेश वटलेच नाहीत...
२०२४-२५ या आर्थिक वर्षामध्ये थकबाकीदारांकडून प्राप्त झालेल्या धनादेशांपैकी न वटलेल्या धनादेशाची एकूण कराची रक्कम १० कोटी १५ लाख रुपये आहे. ज्या मिळकतधारकांचा धनादेश वटला नाही, अशा मिळकतधारकांना नोटीस दिल्या असून त्यांनी कराची रक्कम रोख व ऑनलाइन माध्यमातूनच भरावी, असे आवाहन महापालिका करसंकलन विभागाने स्पष्ट केले आहे.

अशा मिळतील सवलती
३० जूनपर्यंत लागू सामान्य सवलती
- स्वातंत्र्यसैनिक किंवा पत्नीच्या नावावरच्या एका निवासी मालमत्तेस ः ५० टक्के
- महिलांच्या नावावरील एका निवासी मालमत्तेस ः ३० टक्के
- ४० टक्के किंवा त्यापेक्षा जास्त अपंगत्व (दिव्यांग) व्यक्तींच्या एका मालमत्तेस ः ५० टक्के
- संपूर्ण कराची रक्कम आगाऊ भरणाऱ्यास ः ५ टक्के

खासगी शैक्षणिक संस्थांना सवलती
- माझी मिळकत माझी आकारणी योजनेअंतर्गत नोंदणीकृत मालमत्तेस ः ६९ टक्के
- नवीन आकारणी झालेल्या मालमत्ता ः ५ टक्के
- सलग तीन वर्षे नियमित कर भरणाऱ्यास ः २ टक्के
- एप्रिल ते जून दरम्यान ऑनलाइन एकरकमी भरणाऱ्यास ः ५ टक्के
- माजी सैनिक, शहीद सैनिकांच्या कुटुंबियांसाठी ः १०० टक्के
- इलेक्ट्रिक वाहन चार्जिंग स्टेशन ः २ टक्के

‘‘मिळकतधारकांच्या सेवेसाठी महापालिकेच्या सर्व करसंकलन कार्यालये शनिवार (ता. २८) आणि रविवार (ता. २९) चालू ठेवण्यात येणार आहेत. सोमवारी (ता. ३०) कर सवलतीचा शेवटचा दिवस आहे. दोन्ही दिवस कॅश काउंटर सायंकाळी सहा वाजेपर्यंत सुरू ठेवण्यात येणार आहेत.
- अविनाश शिंदे, सहाय्यक आयुक्त, महापालिका
---