पिंपरी, ता. २७ : महापालिकेने जाहीर केलेला शहर मसुदा विकास आराखडा मराठी भाषेत प्रकाशित करावा. तसेच सूचना व हरकती घेण्यास मुदतवाढ द्यावी, यासाठी पिंपरी-चिंचवड शहरातील विधी शाखेच्या विद्यार्थ्यांनी मराठी भाषा व उद्योगमंत्री उदय सामंत यांच्याकडे गाऱ्हाणे मांडले आहे.
यासंदर्भात विद्यार्थ्यांनी कायदेशीर बाबी व राज्याचे धोरण आणि भाषिक महत्त्व यांचा विचार करून, आराखड्याचा मसुदा व नकाशा अतिशुद्ध, प्रशासकीय स्तरावर अचूक अशा मराठीत भाषांतरित करण्याची मागणी सामंत यांच्याकडे केली आहे.

पिंपरी-चिंचवड महापालिकेने १४ मे २०२५ रोजी ४६० पृष्ठाचा इंग्रजी भाषेतील नवीन शहर मसुदा विकास आराखडा हा पालिकेच्या संकेतस्थळावर प्रकाशित करून सार्वजनिक हरकती व सूचना मागवण्यासाठी जाहीर करण्यात आला आहे. यावर त्यानुषंगाने २५० नागरिकांसह खासदार श्रीरंग बारणे, आमदार महेश लांडगे, शंकर जगताप, अमित गोरखे, यांचेदवारे निवेदने दिली आहेत.
विकास आराखडा हा पिंपरी चिंचवड शहरातील सर्व नागरिक यांच्या पुढील भवितव्याचा विचार करून, या भागाचा विकास कसा होईल जनतेच्या अडीअडचणी कशा सुटल्या जातील यानुसार बनवला पाहिजे, अशी मागणी अनीश काळभोर, शुभम काळभोर, धनराज काळभोर यांनी केली आहे.