राहुल हातोले : सकाळ वृत्तसेवा
पिंपरी, ता. २ : केनियातील नैरोबी येथे ज्युनियर रोलबॉल विश्वचषक २०२५ स्पर्धा नुकतीच पार पडली. यात सहभागी भारतीय महिला संघाचे नेतृत्व पिंपरी-चिंचवड शहराची कन्या प्रांजल जाधव हिने केले. या स्पर्धेत भारतीय संघाने विजेतेपद पटकावले. यात प्रांजलने दाखविलेले नेतृत्वगुण आणि तिचा वैयक्तिक खेळ याचे सर्वत्र कौतुक होत आहे. या पार्श्वभूमीवर प्रांजल हिच्याशी ‘सकाळ’ने संवाद साधला.

खेळातील प्रवास :
प्रांजलने तिच्या वयाच्या आठव्या वर्षी स्केटिंगपासून आपल्या खेळाच्या प्रवासाची सुरुवात केली. खेळासोबतच आरोग्य व अभ्यास या दोन्ही गोष्टींमध्ये तिने उत्तम समतोल राखला. या वर्षी झालेल्या राष्ट्रीय स्तरावरील तीन स्पर्धांमध्येही तिचा सहभाग होता.

कुटुंबाचा पाठिंबा :
प्रांजल चिंचवडमधील उद्योगनगर येथे राहते. तिचे वडील अरूण जाधव हे उद्योजक आहेत. आई मेघा यांनी कधी काळी कबड्डी खेळात सहभाग घेतला. पण, पुढे कौटुंबिक जबाबदाऱ्यांमुळे त्यांना थांबावे लागले. मात्र, प्रांजलच्या यशातून तिच्या आईचे स्वप्न पूर्ण झाले, अशी भावना आईने व्यक्त केली आहे.

शैक्षणिक यश :
प्रांजल हिने इयत्ता दहावीच्या परीक्षेत ६९ टक्के गुण मिळवले असून आता अभियांत्रिकीमध्ये पदविका अभ्यासक्रम करण्याचा तिचा मानस आहे.

वरिष्ठ गटात पदार्पणाचे ध्येय
कनिष्ठ गटात यश मिळवल्यानंतर आता वरिष्ठ गटात पदार्पण करणे हे तिचे पुढील लक्ष्य आहे. तिची धाकटी बहीण सेजल देखील टेनिसमध्ये नाव कमावत आहे. प्रांजलच्या या यशाबद्दल संपूर्ण शहरातून आनंद व्यक्त करण्यात येत असून, तिच्या सन्मानार्थ भव्य मिरवणूक काढून गौरव करण्यात आला.

मुली या मुलांपेक्षा कमी नाहीत. त्यांनी आपले आरोग्य सांभाळले, तर अभ्यास आणि खेळ या दोन्ही बाबींमध्ये समतोल साधता येतो. आई-वडील आणि शिक्षकांचा पाठिंबा असल्यानेच मी इथपर्यंत पोहोचली. आगामी काळात सिनिअर गटात खेळून देशाचे नाव मोठे करणार आहे.
- प्रांजल जाधव, रोलबॉल खेळाडू
....