पिंपरी, ता. ०३ : अन्नधान्य वितरण कार्यालय, पुणे शहर अंतर्गत पुणे व पिंपरी -चिंचवड महानगरांमधील परिमंडळ अधिकाऱ्यांच्या कार्यक्षेत्रात १३ ठिकाणी नवीन स्वस्त धान्य दुकानांसाठीचे परवाने मंजूर करण्यात येणार आहेत. त्यासाठीच्या अर्जासाठी ३१ जुलै २०२५ पर्यंत मुदत आहे.

परिमंडळ अधिकारी ‘अ’ विभागांतर्गत डांगे चौक गणेशनगर काळाखडक, रहाटणी रामनगर, पिंपळे निलख गावठाण, मामुर्डी शितोळेनगर, परिमंडळ अधिकारी ‘ग’ विभागांतर्गत लोहियानगर, परिमंडळ अधिकारी ‘ज’ विभागांतर्गत वैभव नगर, तपोवन मंदिर रोड पिंपरीगाव, विणी चर्चजवळ गणेशनगर दापोडी, जय शंकर मार्केट चिंचवड स्टेशन, परिमंडळ अधिकारी ‘म’ विभागांतर्गत रहाटवडे, कुडजे, खेड, शिवापूर, श्रीरामनगर अशा एकूण १३ ठिकाणी नवीन स्वस्त धान्य दुकान परवाना मंजुरीचा जाहीरनामा प्रसिद्ध करण्यात आला आहे. स्वस्त धान्य दुकान मंजुरीसाठीच्या सहामाही कालबद्ध कार्यक्रमास शासनाकडून मुदतवाढ देण्यात आली आहे. जाहीरनामा काढलेल्या ठिकाणांसाठी करावयाचे अर्ज संबंधित परिमंडळ अधिकारी यांच्या कार्यालयात उपलब्ध असणार आहेत. पात्रतेच्या अटी व शर्ती आदी माहितीसाठी संबंधित परिमंडळ कार्यालयाशी संपर्क साधण्याचे आवाहन करण्यात आले आहे.

‘जाहीरनामा काढलेल्या ठिकाणांसाठी करावयाचे अर्ज संबंधित परिमंडळ अधिकारी यांच्या कार्यालयात उपलब्ध होतील. पात्रतेच्या अटी व शर्ती आदि माहितीसाठी संबंधित परिमंडळ कार्यालयाशी संपर्क साधावा. इच्छुक व पात्र संस्थांनी ३१ जुलैपर्यंत संबंधित परिमंडळ अधिकारी कार्यालयात कार्यालयीन वेळेत अर्ज करावेत. विहित मुदतीनंतर प्राप्त झालेल्या अर्जाचा विचार केला जाणार नाही.’

- प्रशांत खताळ, अन्न धान्य वितरण अधिकारी