पिंपरी, ता. ४ ः डेंगी आणि मलेरियासारख्या आजारांचा प्रादूर्भाव रोखण्यासाठी पिंपरी-चिंचवड महापालिकेच्या आरोग्य विभागाच्या वतीने हाती घेण्यात आलेल्या डास प्रतिबंधात्मक मोहिमेर्तंगत आतापर्यंत दोन हजार १९६ ठिकाणांना नोटिसा बजावण्यात आल्या आहेत. तर, २५२ नागरिक व आस्थापनांकडून सात लाखांचा दंड वसूल करण्यात आला आहे. डेंगीचा प्रतिबंध करण्यासाठी महापालिकेच्या वतीने विविध जनजागृती उपक्रम हाती घेण्यात आले असून, औषध फवारणीसह घरांची व कंटेनर तपासणी, घरे, भंगार दुकाने, खासगी आस्थापने, बांधकामाची ठिकाणे यांचीही पाहणी करण्यात येत आहे, अशी माहिती आयुक्त शेखर सिंह यांनी दिली.

आतापर्यंतची कारवाई
- दोन लाख ७० हजार ८८५ घरांच्या तपासणी; पाच हजार १७२ घरांच्या परिसरात डास उत्पत्तीसाठी पोषक वातावरण
- १४ लाख ४६ हजार ४५३ कंटेनर तपासणी; पाच हजार ६४१ कंटेनरमध्ये डास उत्पत्तीसाठी पोषक वातावरण
- ७१७ भंगार दुकानांची तपासणी
- ९८० बांधकामांच्या ठिकाणी अस्वच्छता व पाणी साचल्याचे निदर्शनास
- दोन हजार १९६ ठिकाणी बजावण्यात आल्या नोटिसा
- २५२ नागरिक व आस्थापनांवर दंडात्मक कारवाई; सात लाखांचा दंड वसूल

जनजागृती उपक्रम
- नियमित औषध फवारणी
- घरोघरी माहितीपत्रकांचे वितरण
- शाळांमध्ये विद्यार्थ्यांसाठी जनजागृती प्रशिक्षण
- प्रभागस्तरावर विशेष जनजागृती कार्यक्रम
- सार्वजनिक ठिकाणी स्वच्छता मोहिमा

‘‘डेंगी, मलेरियाचा नायनाट करण्यासाठी जनजागृती करण्याबरोबरच, डासांची उत्पत्ती रोखण्यासाठी औषध फवारणी, तपासण्या आणि आवश्यक त्या सर्व उपाययोजना करण्यात येत आहेत. नागरिकांनी या उपक्रमात सहकार्य करून आपल्या परिसरातील स्वच्छता राखून या व्यापक मोहिमेस सहकार्य करावे.’’
- शेखर सिंह, आयुक्त, पिंपरी-चिंचवड महापालिका
---