पिंपरी, ता. २५ ः पाऊस थांबेना आणि खड्डे बुजवेना, अशी शहराची अवस्था झाली आहे. काही मुख्य रस्त्यांसह अंतर्गत व समाविष्ट गावांतील रस्त्यांवर सर्वत्र खड्डे दिसू लागले आहेत. गेल्या आठ दिवसांत ५८२ खड्डे महापालिकेच्या पहाणीत आढळले आहेत. परिणामी वाहतूक संथगतीने सुरू असते. आता खड्डेमुक्त शहर करण्यासाठी महापालिकेने १५७ अभियंत्यांना प्रशिक्षण दिले आहे. यामध्ये ‘खड्डे नोंदणी व निराकरण प्रणाली’ ॲप व खड्डे भरण्याचे तंत्रज्ञान वापराच्या प्रशिक्षणाचा समावेश होता.
पिंपरी-चिंचवड शहरात डांबरी व कॉक्रिटच्या रस्ते आहेत. अंतर्गत रस्त्यांवर पेव्हिंग ब्लॉक व दगड वापरले आहेत. साधारण १२ फुटांपासून ९० फूट रुंदीच्या रस्त्यांचा समावेश आहे. एकूण रस्त्यांची लांबी दोन हजार ७३ किलोमीटर आहे. शिवाय, मुंबई-पुणे महामार्ग, मुंबई-बंगळूर महामार्ग (देहूरोड-कात्रज बाह्यवळण मार्ग), पुणे नाशिक महामार्ग आहेत. भोसरी-निगडी टेल्को रस्ता, भोसरी प्राधिकरण-निगडी स्पाइन रस्ता, देहू-आळंदी रस्ता, आळंदी-दिघी रस्ता, सांगवी फाटा-रावेत-किवळे रस्ता, नाशिक फाटा-वाकड रस्ता, कस्पटे वस्ती वाकड- काळेवाडी फाटा- चिखली रस्ता असे महत्त्वाचे मोठे रस्ते आहेत. बहुतांश रस्त्यांवर खड्डे आहेत. उन्हाळ्यात विविध वाहिन्या टाकण्यासाठी खोदलेल्या चरांच्या ठिकाणी पाणी साचून मोठे व धोकादायक खड्डे पडले आहेत. त्यातील बहुतांश खड्डे बुजले आहेत. त्यासाठी खडी, मुरूम, पेव्हिंग ब्लॉक, कॉंक्रिट, कोल्डमिक्सचा वापर केला आहे. मात्र, पाऊस सुरूच असल्याने खड्डेही पडत आहेत. त्यामुळे काही रस्त्यांची चाळण झाली आहे. नव्याने केलेले डांबरीकरण उखळले आहे. मुंबई-बंगळूर महामार्गाच्या सेवा रस्त्याचीही दुरवस्था झाली आहे. रस्त्यांवरील खड्डे बुजवून त्यांवर कायम स्वरूपी तोडगा निघावा व पडलेला खड्डा त्वरित बुजवला जावा, यासाठी महापालिकेने ॲप विकसित केले असून अभियंत्यांना प्रशिक्षण दिले आहे. त्यावर नागरिकांना खड्ड्यांबाबत तक्रार करता येणार आहे. आलेल्या तक्रारींचे निराकरण करण्यासाठी ‘खड्डे नोंदणी व निराकरण प्रणाली’ महापालिकेने विकसित केली आहे. यामुळे रस्त्यांवरील खड्डे शोधण्यापासून त्याचे जलद गतीने निवारण करता येणार असल्याचा महापालिका प्रशासनाचा दावा आहे.

शहरात पावसाळ्यात खड्डे पडतात. त्यांच्यासह इतर कारणांमुळे पडणाऱ्या खड्ड्यांच्या निराकरणासाठी महापालिकेच्या १५७ अभियंतांना प्रशिक्षण दिले आहे. यामध्ये ‘खड्डे नोंदणी व निराकरण प्रणाली ॲप’चा (पोठोळे मॅनेजमेंट ॲप) वापर आणि खड्डे भरण्याच्या तंत्रज्ञानावर आधारित डिजिटल प्रशिक्षणाचा समावेश आहे. त्यामुळे खड्डे बुजवताना अत्याधुनिक तंत्रज्ञानाचा वापर केला जाणार आहे.
- मकरंद निकम, शहर अभियंता, महापालिका