राजकीय श्रेयवादात अडकला ‘गारमाळा’ रस्ता

काम बंदचा रहिवाशांना फटका; पावसाळ्यामुळे खड्डे अन् चिखलाचा त्रास
अमोल शित्रे ः सकाळ वृत्तसेवा
पिंपरी, ता. २८ ः रहाटणीतील नखाते वस्ती गारमळा कॉलनीत सहा मीटर रुंद काँक्रीट रस्त्याच्या कामाचे भूमिपूजन होऊन दोन महिने उलटले आहेत. अद्याप काम सुरू झालेले नाही. राजकीय पदाधिकाऱ्यांच्या श्रेय वादात काम रखडले असून चिखल व खड्ड्यांतून वाट काढताना विद्यार्थी, महिला, ज्येष्ठांना कसरत करावी लागत आहे.
गारमळा कॉलनीजवळ प्रभाग बदलतो. शेवटची कॉलनी असल्याने तत्कालीन नगरसेवकांनी लक्ष दिले नाही. लगतच्या पिंपळे सौदागर कोकणे चौक, शिवार चौकाला लागून असलेल्या सर्व सोसायट्यांमध्ये पेव्हिंग ब्लॉक्स बसविले. अन्य कॉलन्यांमध्ये काँक्रीट रस्ते बनविले. गारमळा कॉलनीकडे दुर्लक्ष झाले आहे. त्यामुळे रस्त्याची समस्या सोडविण्यासाठी नागरिकांनी तत्कालीन नगरसेवकांच्या कार्यालयाचे उंबरठे झिजवले. तरीही दखल न घेतल्याचा आरोप नागरिकांनी केला आहे. आता त्यांचा कार्यकाळ संपूनही तीन वर्षे उलटली आहेत. महापालिका प्रशासनाने काँक्रीट रस्ता करण्यासाठी तीन कोटी ८९ लाख ९४ हजार ५९० रुपये रकमेची निविदा प्रसिद्ध केली. क्लिन्सी कन्स्ट्रक्शनला कामाचे आदेश दिले. दोन महिन्यांपूर्वी भूमिपूजन झाले. त्यासाठी आमदारांसह प्रभागातील माजी नगरसेवकही उपस्थित होते. आता राजकीय श्रेयवाद रंगला आहे. अधिकाऱ्यांवर राजकीय दबाव आणून काम थांबवल्याची चर्चा आहे. त्याचा फटका मात्र गारमळा कॉलनी, सिल्वर ओक आणि सिद्धी ग्रीन सोसायटीतील नागरिकांना बसत आहे.

संतप्त नागरिकांचा रोष
कॉलनीचे प्रवेशद्वार ते शेवटपर्यंत सर्वत्र खड्डे पडून चिखल झाला आहे. पावसामुळे त्यात भर पडत आहे. सिल्वर ओक आणि सिद्धी ग्रीन सोसायट्यांमधील रहिवाशांसाठी हा एकमेव रस्ता आहे. निसरड्या रस्त्यामुळे विद्यार्थी, ज्येष्ठ नागरिक, महिलांना त्रास सहन करावा लागत आहे. त्यामुळे रहिवाशांनी संताप व्यक्त केला आहे.

गारमळा कॉलनीतील रस्त्याच्या कामाबाबत आमच्यावर कसलाही राजकीय दबाव नाही. सध्या पावसाळा सुरू असल्यामुळे रस्ता करताना अडथळे येतात. पावसाळा संपताच कामाला सुरुवात केली जाईल.
- सुनील शिंदे, स्थापत्य कार्यकारी अभियंता, ‘ड’ प्रभाग
--