सोमाटणे, ता.२८ ः केवळ सायकल आणि दुचाकी वाहनांना परवानगी असताना सांगवडे येथील पुलावर
चारचाकी वाहनांची रहदारी सुरूच आहे. त्यामुळे कुंडमळ्यातील पुलासारखी दुर्घटना होण्याचा धोका निर्माण झाला आहे.
गेल्या अडीच दशकांपूर्वी पवना नदीवर मोटारसायकल, सायकल व पादचाऱ्यांच्या सोयीसाठी सांगवडे, मामुर्डी, गहुंजे गाव जोडण्‍यासाठी लोखंडी पादचारी पूल बांधण्यात आला होता. सुरुवातीला एक दशक या पुलावरुन केवळ मोटारसायकल, सायकल व पादचाऱ्यांची ये-जा सुरू होती. परंतु नजीकच्या काळात सायकल, मोटारसायकल यांची जागा चारचाकी वाहनांनी घेतल्यानंतर परिसरातील नागरिकांनी या कमकुवत लोखंडी पुलाचा वापर चारचाकी वाहनासाठी सुरू केला. या वाहनांच्या वजनांनी पाच वर्षांपूर्वी पुलाचे अँगल कमकुवत होऊन वाकले; तर पुलावरील स्लॅबला मोठे तडे गेले. ही बाब सार्वजनिक बांधकाम विभागाच्या निदर्शनाला आल्यानंतर पुलास धोका होऊ नये यासाठी त्यांनी हा पूल चारचाकी वाहनांच्या वाहतुकीसाठी बंद करुन पुलाजवळ सूचना
फलक लावले आहेत. दरम्यानच्या काळात, गेल्या महिन्याभरापासून पिंपरी-चिंचवड महानगरपालिकेच्या अर्थ साहाय्याने सार्वजनिक बांधकाम विभागाने तीनशे सात मीटर लांबीचा व बारा मीटर रुंदीच्या नवीन पुलाचे काम सुरू केले. वर्षभराच्या कालावधीत ते काम पूर्ण होण्याची अपेक्षा आहे. परंतु तेवढी प्रतीक्षा करणे नागरिकांना कठीण झाले असून धोका पत्कारुन अनेक जण चारचाकी वाहने पुलावरुन नेत आहेत. पुलाचा वापर नागरिकांनी चारचाकी वाहनांसाठी करु नये, असे आवाहन सार्वजनिक बांधकाम विभाग व सरपंच रोहन जगताप यांनी केले आहे.