सकाळ वृत्तसेवा
पिंपरी, ता. १३ ः राज्यातील २०१९ पूर्वीच्या वाहनांना उच्च सुरक्षा वाहन क्रमांक पाटी (एचएसआरपी) बंधनकारक झाली आहे. पिंपरी-चिंचवड शहरातील सुमारे अडीच लाख वाहनमालक ‘एचएसआरपी’ बसवून घेण्यासाठी वेळ आणि पैसा खर्च करीत आहेत. शासकीय आस्थापनांचे मात्र ही पाटी बसविण्याकडे दूर्लक्ष झाल्याचे दिसते. त्यामुळे हा दंडक फक्त खासगी वाहनांनाच आहे का, असे कोडे सामन्य नागरिकांना पडले आहे.
सार्वजनिक वाहतूक सेवा देणाऱ्या बहुतांश वाहनांबरोबरच इतर शासकीय आस्थापनांच्या बहुतेक वाहनांना अजूनही एचएसआरपी लावण्यात आलेली नाही. परिवहन विभागाने एक जानेवारीपासून ‘एचएसआरपी’ बसविण्याची सुविधा उपलब्ध केली आहे. हे काम तीन खासगी कंपन्यांना देण्यात आले आहे. त्यांच्यामार्फत राज्यातील ५६ प्रादेशिक आणि उपप्रादेशिक परिवहन कार्यालयांतर्गत ‘एचएसआरपी’ उपलब्ध करून दिल्या जात आहेत.
वाहतूक नियमांचे उल्लंघन केल्यावर सामान्य वाहनचालकांना दंड ठोठावणाऱ्या वाहतूक पोलिसांच्या बहुतांश वाहनांवर ही पाटी नाही.
---
दृष्टिक्षेपात
- २४ लाख १५ हजार ५१ः पिंपरी-चिंचवड आरटीओकडील वाहनांची नोंद
१५ लाख ३९ ः २०१९ पूर्वीची वाहने
३ लाख ८६ हजार ६८३ ः ‘एचएसआरपी’साठी नोंद झालेली वाहने
- २ लाख ५१ हजार १२५ ः ‘एचएसआरपी’ बसविलेली वाहने
१७ टक्के ः ‘एचएसआरपी’ बसविलेल्या वाहनांचे प्रमाण
- ८ महिने ः आदेश निघाल्यापासूनचा कालावधी
(१३ ऑगस्टपर्यंतची आकडेवारी)
---
या शासकीय वाहनांवर ‘एचएसआरपी’ नाही
- पुणे महानगर परिवहन महामंडळाच्या (पीएमपीएमएल) बस
- महाराष्ट्र राज्य मार्ग परिवहन महामंडळ (एसटी)
- वाहतूक पोलिसांची वाहने
----------
खासगी आणि शासकीय या सर्वांसाठी नियम सारखे आहेत. २०१९ पूर्वीच्या सर्वच वाहनचालकांनी १५ ऑगस्टपूर्वी ‘एचएसआरपी’ बसवून घ्यावे. शासकीय आस्थांपनांनी देखील त्यांची वाहनांची नोंदणी करुन लवकरात लवकर ‘एचएसआरपी’ बसवून घ्यावी.
- राहुल जाधव, उपप्रादेशिक परिवहन अधिकारी, पिंपरी-चिंचवड
---------