पिंपरी, ता. ३० : आकुर्डी येथील पुणे विभागीय कर्मचारी भविष्य निधी संघटनेच्या वतीने भविष्य ‘निधी आपल्या निकट’ हा जनजागृतीपर कार्यक्रम भोसरी येथे नुकताच घेण्यात आला. कार्यक्रमात ईपीएफओ अधिकारी कुमार अमित यांनी कर्मचाऱ्यांसाठी लागू करण्यात येणाऱ्या नव्या योजनांची माहिती दिली.

या वेळी शहरातील विविध कंपन्यांचे प्रतिनिधी, कर्मचारी आणि सेवानिवृत्त व्यक्ती मोठ्या संख्येने उपस्थित होते. यामध्ये ‘पंतप्रधान विकसित भारत’ रोजगार योजनांची माहिती देण्यात आली. ही योजना १ ऑगस्ट २०२५ पासून लागू होत आहे. या योजनेनुसार पात्र नव्या कर्मचाऱ्यांच्या भविष्य निधी खात्यात सरकारकडून थेट दरवर्षी १५ हजार रुपये जमा केले जाणार आहेत. संबंधित कर्मचाऱ्यांना याचा लाभ बँक खात्यात मिळेल. ही योजना ३१ जुलै २०२७ पर्यंत लागू राहणार असून पात्रतेनुसार २ वर्षांपर्यंत अतिरिक्त लाभ मिळू शकतो, असे कुमार अमित यांनी कार्यक्रमात सांगितले.

कार्यक्रमात ईपीएफओचे अधिकारी एन. रमेश आणि रऊफ शेख यांनी निवृत्त कर्मचाऱ्यांसाठीच्या पेन्शन योजना व पेन्शन पेमेंट ऑर्डर या विषयी मार्गदर्शन केले. प्रयास पेन्शन योजनेअंतर्गत सेवानिवृत्त कर्मचाऱ्यांना पेन्शन पेमेंट आदेश संबंधित नोडल अधिकारी एन. रमेश व रउफ शेख यांच्या हस्ते प्रदान करण्यात आले.
सदस्यांच्या तक्रारींचे निवारण रितेश कुमार व पंकज नेमा यांनी केले. ईपीएफओचे प्रादेशिक आयुक्त सनत कुमार (आकुर्डी) आणि सुब्रत कुमार (हिंजवडी) यांनी उद्योग प्रतिनिधींना या योजनेस जास्तीत जास्त कर्मचारी जोडण्याचे आणि यूएएन सक्रिय करून केवायसी पूर्ण करण्याचे आवाहन केले. या उपक्रमाच्या यशस्वी आयोजनाबद्दल अल्ट्रा कॉर्पोटेक प्रा. लि.चे मनुष्यबळ व्यवस्थापक राहुल बागले यांनी ईपीएफओचे आभार मानले.