पिंपरी, ता. ३१ ः राज्य औद्योगिक विकास महामंडळ (एमआयडीसी) चाकण परिसरात आजपासून (ता. १) पुणे महानगर परिवहन महामंडळाची (पीएमपीएमएल) आंबेठाण चौक ते आंबेठाण चौक (बस मार्ग ३८४ व ३८५) वर्तुळाकार बस सेवा सुरू होणार आहे. तर भोसरी ते निघोजेगाव (बस मार्ग ३४९) हा नवीन बस मार्ग सुरू होणार आहे. हे दोन्ही मार्ग एमआयडीसी परिसरात सुरू होत असल्याने कामगारांचा प्रवास सुखकर होणार आहे.
एमआयडीसी आणि लगतच्या परिसरात दररोज लाखो कामगार काम करतात. पण, अपुऱ्या सार्वजनिक वाहतूक सुविधांमुळे स्वतःची वाहने किंवा रिक्षा, ओला, उबेर यासारख्या ॲप आधारित खासगी वाहतूक सेवा देणाऱ्या वाहनांचा आधार घ्यावा लागतो. त्यामध्ये बहुतांश वेळा खासगी वाहनचालकांकडून कर्मचाऱ्यांची आर्थिक लूट होत होती. त्यामुळे कामगारांकडून गेल्या काही दिवसांपासून एमआयडीसी परिसरात वर्तुळाकार बस सेवा सुरू करण्याची मागणी होत होती. पीएमपीएमएलच्या अधिकाऱ्यांनीही प्रवाशांची मागणी लक्षात घेता जुलै महिन्याच्या सुरुवातीला चाकण परिसरात बस मार्गांचे सर्वेक्षण केले होते.

प्रत्येक अर्धा तासाने बस
आंबेठाण चौक ते आंबेठाण चौक (बस मार्ग ३८५) क्लॉक वाइज आणि त्याच मार्गावर (बस मार्ग ३८४) ॲन्टी क्लॉक वाइज सुरू होणार आहे. सकाळी साडेसहापासून ते रात्री १०.१५ पर्यंत प्रती ३० मिनिटांच्या अंतराने बस सेवा सुरू राहणार आहे. या वर्तुळाकार मार्गावर सहा बस मार्फत ७२ फेऱ्या होणार आहेत.

एमआयडी परिसरात सार्वजनिक वाहतूक सुविधा वाढविण्याच्या दृष्टीने प्रायोगिक तत्वावर काही नवीन बस मार्ग सुरू करण्याचा निर्णय घेतला आहे. त्यामुळे एमआयडीसीतील कामगार, शाळा- महाविद्यालयीन विद्यार्थ्यांना बस सुविधा उपलब्ध होईल.
- पंकज देवरे, अध्यक्ष व व्यवस्थापकीय संचालक, पीएमपीएमएल

असा असेल वर्तुळाकार मार्ग
आंबेठाण चौक (चाकण), आळंदी फाटा, निघोजे फाटा, मर्सिडीज चौक, स्कोडा गेट नं १, सिग्मा चौक, एचपी चौक, बजाज कंपनी, महाळुंगे, खराबवाडी, चाकण आणि आंबेठाण चौक.

भोसरी ते निघोजेगाव बस मार्ग
भोसरी चाकण रोड, ई क्षेत्रीय कार्यालय, मोशी जकात नाका, मोशी गाव, चिंबळी फाटा, कुरळी फाटा, निघोजे फाटा, मर्सिडीज चौक, स्कोडा गेट - २, सिग्मा कंपनी, इड्युरन्स कंपनी, महिंद्रा कंपनी गेट - १, ससा कंपनी, निघोजे गाव.