पिंपरी, ता. २ ः राज्य मार्ग परिवहन (एसटी) महामंडळाकडून अंगारकी चतुर्थीनिमित्ताने १२ ऑगस्ट रोजी शिवाजीनगर व पिंपरी चिंचवड आगारातून अष्टविनायक दर्शनाकरिता विशेष बस सोडण्यात येणार आहेत. त्याची ऑनलाइन आरक्षण सुविधा नागरिकांसाठी खुली करण्यात आली असल्याची माहिती एसटी प्रशासनाने दिली.
शिवाजीनगर व पिंपरी आगारातून अष्टविनायक दर्शन बस मंगळवारी (ता.१२) सकाळी ७ वाजता सुटणार आहे. या गाडीचे प्रौढ आणि मुलांकरिता तिकीट दर वेगवेगळे असणार असून प्रौढांसाठी १ हजार १७४ रुपये; तर मुलांसाठी ५७४ रुपयांपर्यंत असतील. ओझर (भक्त निवास) येथे राहण्याची व जेवणाची उत्तम सोय असून तो खर्च प्रत्येक प्रवाशाने स्वतः करावयाचा आहे. अष्टविनायक दर्शनासाठी ऑनलाइन आरक्षण सुरू झाले असून महामंडळाचे www.msrtc.gov.in या संकेतस्थळावर आणि महामंडळाच्या ॲपवर आरक्षण करता येणार आहे. प्रवाशांना अष्टविनायक सेवेसाठी एसटीची महिला सन्मान योजना आणि अमृत जेष्ठ नागरिक योजनेचा लाभ घेता येणार आहे. जास्तीत जास्त नागरिकांनी या बस सेवेचा लाभ घ्यावा, असे आवाहन विभाग नियंत्रक अरुण सिया यांनी केले आहे.