सोमाटणे, ता. २९ ः अजित पवार यांना श्रद्धांजली वाहून गुरुवारीही पवन मावळातील व्यापाऱ्यांनी बाजारपेठा बंद ठेवल्या. बुधवारी सकाळी अजित पवार यांच्या विमानाचा अपघात झाला. यात त्यांच्यासह विमानातील पाच जणांचा होरपळून मृत्यू झाल्याची बातमी वाऱ्यासारखी सर्वत्र पसरली. ही बातमी समजताच पवन मावळातील शेतकऱ्यांनी शेतीचे कामे बंद केली. व्यापारी, व्यावसायिकांनी दुकाने, कार्यालये बंद करून हळहळ व्यक्त केली. आजचा दुसरा दिवसही सर्वांचा दुःखातच गेला असून, सकाळी गावागावांतील कार्यकर्त्यांसह ग्रामस्थांच्या वतीने सामुहिक श्रद्धांजली अर्पण करून दुसऱ्या दिवशीही सर्व व्यवहार बंद ठेवले. परिणाम आज दुसऱ्या दिवशीही प्रमुख बाजारपेठ असलेल्या सोमाटणे, चांदखेड येथील बाजारपेठांत शुकशुकाट होता. तालुक्यातील कार्यकर्त्यांनी पहाटेच बारामतीकडे धाव घेतली. उर्वरित येथील स्थानिक कार्यकर्त्यांच्या वतीने गावात ग्रामस्थांच्या समवेत सामुहिक श्रद्धांजली वाहिली.