सकाळ इम्पॅक्ट

रावेत, ता. ८ : रावेत, आकुर्डी परिसर आणि मुकाई चौक ते औंध बीआरटीएस रस्त्याच्या पदपथावरील आणि सार्वजनिक ठिकाणांवरील कचरा साफ करण्यात आला आहे. विशेषतः म्हस्के वस्ती, रावेत येथील ओपन जिम परिसरात दीर्घकाळ साचलेला कचरा, प्लास्टिक आणि ओला-कोरडा कचरा हटविण्यात आला आहे.
मागील काही दिवसांपासून रावेत आणि आकुर्डी परिसरातील पदपथांवर साचलेल्या कचऱ्यामुळे नागरिकांना चालणे अवघड झाले होते. काही ठिकाणी दुर्गंधी आणि डासांची पैदास वाढल्याने परिसरातील रहिवाशांनी महापालिकेकडे वारंवार तक्रारी केल्या. त्यावर ‘सकाळ’ने वृत्त प्रसिद्ध करून स्वच्छतेकडे लक्ष वेधले. त्याची दखल घेत महापालिकेच्या आरोग्य विभागाने तत्काळ कारवाई करत सफाई कर्मचाऱ्यांच्या मदतीने रस्ते आणि पदपथ स्वच्छ केले. सर्व नागरिकांनी कचरा पदपथांवर न टाकता महापालिकेच्या ट्रॉलीचा वापर करावा, असे आवाहन आरोग्य विभागाने केले आहे.

‘‘परिसर स्वच्छ झाल्याने आम्ही समाधानी आहोत. पण, ही स्वच्छता कायम राखणे गरजेचे आहे.’’
- प्रतीक पाटील, रहिवासी, रावेत